Փարիզում ադրբեջանցիները պատռել են Հայաստանի և Արցախի դրոշը

Սեպտեմբերի18-21-ը Հայաստանի ազգային մրցունակության հիմնադրամը և Լեռնային Ղարաբաղի Հանրապետության ներկայացուցիչները հայկական զբոսաշրջային ընկերությունների հետ համատեղ, Փարիզում կայանալիք «TopResa 2012» զբոսաշրջային միջազգային տարեկան ցուցահանդեսին պետք է ներկայացնեն Հայաստանը և Արցախը:

Ցուցահանդեսում, հատկանշականն այն էր, որ միջազգային ցուցահանդեսներին մասնակցության ողջ պատմության ընթացքում առաջին անգամ Հայաստանը և Լեռնային Ղարաբաղը կներկայացվեն միասնական տաղավարի ներքո:

Լուրեր.com–ի Ֆրանսիայի աղբյուրները տեղեկացնում են, որ այս գիշեր ադրբեջանցիները ջարդուփշուր են արել այն միասնական տաղավարը, որի ներքո պետք է հանդես գային Հայաստանը և Լեռնային Ղարաբաղը, պատռել են Հայաստանի և Արցախի դրոշը, Հայաստանի և Արցախի ընդհանուր քարտեզը, տեղեկատվական բուկլետները։ 

Տարածքում եղել են նաև անվտանգության աշխատակիցներ, սակայն ադրբեջանցիներին զսպել չեն կարողացել։

Առավոտյան Հայաստանի պատվիրակությունը հրավիրել է համապատասխան կազմակերպություն, որոնք վերականգնել են տաղավարը, սակայն ցուցահանդեսի կազմակերպիչները հայկական կողմից պահանջում են, որպեսզի վերականգնված տաղավարում չլինի ԼՂՀ-ն հիշատակող որևէ ցուցանմուշ, քանի որ այն կարող է կրկին առաջացնել ադրբեջանցիների զայրույթը և կոնֆլիկտի տեղիք տալ։ Լուրեր.com-ի աղբյուրները տեղեկացնում են, որ մինչ այս պահը լարվածությունը շարունակվում է, և Հայաստանի պատվիրակությունն ամեն ինչ անում է՝ Արցախի հետ մեկտեղ հանդես գալու ուղղությամբ։

ԱԳՆ մեր աղբյուրները հավաստիացրեցին, որ վաղն անպայման արձագանքելու են այս վանդալիզմին:

Հիշեցնենք, որ այս տարի ցուցահանդեսին նախատեսվում է շուրջ 160 երկրներից զբոսաշրջության ոլորտի ավելի քան 27 հազար ներկայացուցիչների մասնակցություն:

Համատեղ մասնակցության այս նախադեպով հանդերձ միջազգային հանրությանը ներկայացվելու են Հայաստանի և Արցախի պատմամշակութային և քրիստոնեական ժառանգությունը ցուցադրող լիովին վերափոխված նոր գովազդային նյութեր և քարտեզներ:

Հայկական պատվիրակության՝ ցուցահանդեսին պատշաճ ներկայացվածության կազմակերպմանն իր գործուն աջակցությունն է ցույց տվել Ֆրանսիայում ՀՀ դեսպանատունը: