Սաֆարովը մինչև վերջ պետք է կրի իր պատիժը. Բազմամարդ ցույց Փարիզում

Ադրբեջանի դեսպանատան առջև Փարիզում կայացել է բազմամարդ բողոքի ցույց։ Իլհամ Ալիևի այցի դեմ հանրահավաքին մասնակցել է մոտ երկու հազար մարդ, այդ թվում՝ երկրի խորհրդարանի պատգամավորներ աջակողմյան և ձախակողմյան ուժերից։

Բողոքի ակցիայի մասնակիցները մեծ ոգևորությամբ են մասնակցել հանրահավաքին՝ պահանջելով Ֆրանսիայի իշխանություններից դատապարտել Ադրբեջանի հայատյաց քաղաքականությունը և քայլեր ձեռնարկել, որպեսզի ոճրագործ Սաֆարովը մինչև վերջ կրի իր պատիժը։
«Հայությունը կպայքարի այնքան, մինչև ողջ միջազգային հանրությունն ընդունի այն փաստը, որ Լեռնային Ղարաբաղի Հանրապետությունն ինքնորոշված պետություն է ու երբեք չի կարող լինել Ադրբեջանի կազմում»,-հանրահավաքում հայտարարել է Փարիզի Հայ դատի գրասենյակի տնօրեն Հրաչ Վարժապետյանը։

«Ֆրանսիայի բողոքի ցույցը մեծ արձագանք է գտել նաև տեղի զանգվածային լրատվամիջոցներում, որոնք մեծ հետաքրքրությամբ են լուսաբանում միջոցառումը»,- նշում է նա։ Մասնակիցներն իրենց վրդովմունքն են հայտնել նաև Ռամիլ Սաֆարովին ներում շնորհելու կապակցությամբ և կոչ են արել Ֆրանսիայի նախագահին՝ անել հնարավոր ամեն բան արդարադատությունը վերականգնելու համար։