Կառավարությունը մերժեց Բագրատյանի նախագիծը

Այսօր ՀՀ կառավարության նիստում վարչապետ Տիգրան Սարգսյանը մերժեց Հրանտ Բագրատյանի հեղինակած նախագիծը։ 

Նիստում քննարկվեց ԱԺ Հայ Ազգային կոնգրեսի պատգամավոր Հրանտ Բագրատյանի հեղինակած «Նվազագույն ամսական աշխատավարձի մասին» օրենքում փոփոխություն կատարելու մասին օրինագիծը: Հ. Բագրատյանն առաջարկել էր նվազագույն աշխատավարձը 32.500 դրամից դարձնել 72.500 դրամ:

Նշենք, որ նախագծում  նշված է, որ առաջարկվող  նվազագույն աշխատավարձի բարձրացումը համահունչ է Հայաստանի Հանրապետության կառավարության որդեգրած քաղաքականությանը: Ավելին, Հայաստանի Հանրապետության կառավարության ծրագրի իրականացմամբ 2012-2017 թվականների ընթացքում  նախատեսվում է նվազագույն աշխատավարձի մակարդակի առնվազն կրկնապատկում, նվազագույն աշխատավարձով աղքատության ցուցանիշի առնվազն 140 տոկոս մակարդակի ապահովում:

Նվազագույն ամսական աշխատավարձի չափի բարձրացում  նախատեսված է Հայաստանի Հանրապետության 2013-2015 թվականների պետական միջնաժամկետ ծախսային ծրագրով, 2013 թվականի Հայաստանի Հանրապետության պետական բյուջեի նախագծով: Սրա հետ մեկտեղ հարկ է նկատի ունենալ մի շարք հանգամանքներ՝ Հայաստանի Հանրապետության պետական բյուջեի իրական հնարավորությունները և ծրագրի իրականացման փուլայնությունը: