Սփյուռքի գործոնը՝ Հայաստանի անկախության ձեռքբերման և կայացման ճանապարհին

ՀՀ սփյուռքի նախարարությունը ներկայացրեց «Իմ Հայաստան» ֆիլմը՝ նվիրված Հայաստանի Հանրապետության անկախության 20-ամյակին:

Ֆիլմն անկեղծ զրույց էր աշխարհի տարբեր անկյուններում հաստատված ու կայացած հայորդիների հետ, մտերմիկ կոչ հայրենիքի ձայնին ականջալուր լինելու:

Ֆիլմը ներկայացնում էր Հայաստանի Հանրապետության անկախության ձեռքբերմանը նախորդող ժամանակահատվածում աշխարհասփյուռ հայության դերն ու նշանակությունը: Առանձնահատուկ կերպով հիշատակվեցն բոլոր այն անվանի հայերը, ովքեր անցած 20 տարիների ընթացքում նշանակալի ներդրում են ունեցել անկախ պետականության կայացման ճանապարհին:

Արծարծվում էր այն հիմնական գաղափարը, որ եթե Հայաստանի անկախության ձեռքբերման սկզբնական տարիներին հայկական սփյուռքը մարդասիրական օգնության ու բարեգործական նկատառումներով էր աջակցում հայրենիքին, ապա աստիճանաբար սփյուռքահայ գործիչները հեռանկարային ներդրումներ են կատարում տնտեսության ամենատարբեր ճյուղերում՝ այսպիսով իսկ նպաստելով հայրենական տնտեսական մրցունակության բարձրացմանը:

ՀՀ սփյուռքի նախարար Հրանուշ Հակոբյանը հայրենիք-սփյուռք կապի ամրապնդման գործում, ի թիվս այլ հանգամանքների, կարևորեց երկքաղաքացիության ինստիտուտի ներդրումը: Նախարարի խոսքով՝ հայ է այն մարդն, ով իրեն հայ է զգում. հատկապես վերջին տարիներին զգացողությունը բերվել է առաջին պլան, ինչն էլ Հայաստան գալու կարևորագույն նախապայմաններից է: Նախարար Հակոբյանը կարևոր ձեռքբերում համարեց ՀՀ սփյուռքի նախարարության՝ որպես պետական քաղաքականության իրականացման գործիքի ստեղծումը:

- Մենք այսօր երախտագիտությամբ ենք հիշում սփյուռքահայերի ներդրումային ծրագրերի և գործի մասին,-նշեց ՀՀ սփյուռքի նախարար Հ. Հակոբյանը,- Մեզ համար կան անհատականություններ, ում նեդրումները Հայաստանի տնտեսությունում, առողջապահության, մշակույթի, կրթության բնագավառներում հեղափոխություն են արել: Ուրախ ենք և երջանիկ, որ քաղաքական տարբեր ծրագրերի և քաղաքականության փոփոխության արդյունքում Սփյուռքն ավելի է մոտենում Հայրենիքին, Հայաստանի Հանրապետությունը իրավամբ հռչակվել է համայն հայության հայրենիք: Սա ամենակարևոր շեշտադրումն էր, որ արվեց վերջին տարիների ընթացքում:

Նախարարի հավաստեց, որ ֆիլմի ստեղծմամբ նախարարությունը նպատակ ուներ ծանրութեթև անել, հանրության լայն շրջանակների համար արժևորել Սփյուռքի գործոնը, գնահատական տալ այն մարդկանց, ովքեր ներդրումներ են իրականացրել՝ դառնալով փայլուն օրինակ ու դաս մյուս հայորդիների համար: