Հանդիպում «Սփյուռք-Հայրենիք» մշակութային միության ներկայացուցիչների հետ

ՀՀ սփյուռքի նախարար Հրանուշ Հակոբյանն ընդունեց Ավստրալիայի հայ համայնքի «Սփյուռք-Հայրենիք» մշակութային միության ներկայացուցիչներ Լևոն Դամիրյանին և Կիրակոս Մարգարյանին: Նրանց խոսքերով՝ մինչ օրս ավստրալահայ համայնքը ակնածանքով է հիշում նախարարի այցը և ելույթն Ավստրալիայում:

Նախարար Հակոբյանը լսեց ավստրալահայերի մտահոգությունները՝ կապված Ավստրալիայի հայ համայնքի ներսում հայապահպանության և լեզվի պահպանության խնդիրների հետ: Հյուրերը ցանկություն հայտնեցին ՀՀ սփյուռքի նախարարության անմիջական հսկողության և աջակցության շնորհիվ բարձրացնել հատկապես երիտասարդների մշակութային և ազգային գիտակցությունը: Պարոնայք Դամիրյանն ու Մարգարյանը ներկայացրեցին, որ իրենք ջանքեր չեն խնայում հայերին դեպի Հայաստան ուղղորդելու, պատմական հայրենիքին ծանոթացնելու գործում:

Նախարար Հակոբյանը ողջունեց ավստրալահայերի նախաձեռնողականությունը և հավաստիացրեց, որ նախարարությունը պատրաստ է աջակցել հայապահպանությանն ու ազգապահպանությանը միտված բոլոր աշխատանքներում: