Այս տարի գործազուրկների թիվը նվազել է

2012թ.-ի հուլիսի 1-ի դրությամբ «Զբաղվածության պետական ծառայություն» գործակալության մարզային և տարածքային կենտրոններում հաշվառված աշխատանք փնտրողների թիվը կազմել է 77.0 հազար մարդ, որը նախորդ տարվա նույն ժամանակահատվածի նկատմամբ նվազել է 12.8 %-ով (88.3 հազ. մարդ), իսկ տարեսկզբի նկատմամբ՝ 5.8%-ով (81.7 հազ. մարդ): Աշխատանք փնտրողների թվաքանակում կանանց տեսակարար կշիռը կազմել է 68.6% (52.8 հազ. մարդ), երիտասարդների տեսակարար կշիռը՝ 24.4% (18.8 հազ, մարդ): Աշխատանք փնտրողների 84.5%-ը (65.1 հազ. մարդ) ստացել է գործազուրկի կարգավիճակ, գործազուրկների թվաքանակում կանանց տեսակարար կշիռը կազմում է 71.0%: 16-30 տարեկան երիտասարդների տեսակարար կշիռը գործազուրկների թվաքանակում կազմել է 22.5% կամ 14.6 հազ. մարդ:

Գործատուների կողմից ներկայացվող թափուր աշխատատեղերի ամսական միջին թիվը 2011թ. կազմել է 1592, որի 46.5%-ից ավելին կրկնվող հայտերն են: 2012թ. վեց ամսվա կտրվածքով թափուր աշխատատեղերի ամսական միջին թիվը կազմել է 1,710:

Տարեսկզբից աշխատանքի է տեղավորվել 5,573 աշխատանք փնտրող, ինչը նախորդ տարվա նույն ժամանակահատվածի նկատմամբ նվազել է 1.2%-ով (5,641մարդ): Աշխատանքի տեղավորվածներից 3,161-ը (56.9%-ը) կանայք են, 1,662-ը (29.8%-ը)՝ երիտասարդներ:

Աշխատանքի տեղավորվածների թվաքանակում ամենամեծ տեսակարար կշիռը կազմում են արդյունաբերության ոլորտում տեղավորվածները՝ 24.2%, ավտոմեքենաների առևտրի, կենցաղային արտադրատեսակների ու անձնական օգտագործման իրերի նորոգման ոլորտներում տեղավորվածները՝ 22.0%, շինարարության ոլորտում տեղավորվածները՝ 10.1%:

2012թ. հուլիսի 1-ի դրությամբ գործազրկության նպաստ է ստանում 12,654 մարդ կամ գործազուրկների ընդհանուր թվի 19.5%-ը:

Այս տարվա հուլիսի 1-ի դրությամբ զբաղվածության կարգավորման պետական ծրագրերում ընդգրկվել են աշխատանք փնտրողների 19.7%-ը:

Տարեսկզբից գործազրկության նպաստի ստացման իրավունք է ձեռք բերել շուրջ 8,100 գործազուրկ՝ նախորդ տարվա 12,835-ի փոխարեն: Տարեսկզբին գործազրկության նպաստ ստացողների թիվը 14,448 անձից առաջին կիսամյակում նվազել է 1,794–ով և կազմել 12,654: Նպաստառու գործազուրկների թվաքանակն ամսական հաստատված 20,850-ի փոխարեն կազմեց շուրջ 13,525:

«Մասնագիտական ուսուցման կազմակերպում» ծրագրում ընդգրկվել է 935 անձ (այդ թվում՝ 711 գործազուրկ, 60 հաշմանդամություն ունեցող անձ, 161 գյուղատնտեսական նշանակության հողի սեփականատեր հանդիսացող աշխատանք փնտրող անձ, 3 երկարամյա ծառայության, արտոնյալ պայմաններով և մասնակի կենսաթոշակ ստացող չզբաղված անձ) նախատեսված 718 անձի փոխարեն, որը հնարավոր է դարձել բանակցային գործընթացների արդյունքում նախատեսված միջինից ցածր ֆինանսական միջոցներով պայմանագրերի կնքման շնորհիվ:

«Թափուր աշխատատեղերի տոնավաճառի կազմակերպում» ծրագրով իրականացվել է թվով 2 տոնավաճառ՝ Հրազդան և Իջևան քաղաքներում, որոնց մասնակցել է 69 գործատու, շուրջ 1670 աշխատանք փնտրող, գործատուների կողմից ներկայացվել է 198 թափուր և 62 կանխատեսվող աշխատատեղ: Ըստ նախնական տվյալների աշխատանք տեղավորման նախնական պայմանավորվածություն է ձեռք բերել 20-ը: