Թռչունների գլխաքանակը նվազում է

Մինչեւ 2010 թ.-ը ՀՀ-ում թռչնաբուծության ցուցանիշներն անընդհատ անկում են ապրել: Պատճառը՝ պետական աջակցության ծրագրերի շարքից թռչունների պատվաստման ծրագրի հեռացնելն էր: Այդ մասին այսօր՝ սեպտեմբերի 26-ին, ՀՀ Ազգային Ժողովի մշտական հանձնաժողովների համատեղ նիստում հայտարարել է ՀՀ գյուղատնտեսության նախարար Սերգո Կարապետյանը՝ պատասխանելով պատգամավոր Վահրամ Բաղդասարյանի հարցին:

Ըստ ՀՀ գյուղատնտեսության նախարարի՝ թռչունների պատվաստման ծրագրի դադարեցումից հետո թռչունների թիվը մոտ 30%-ով նվազել է, որի հետևանքով նվազել է նաև ձվի արտադրությունը: Սակայն եթե ձվի ինքնաբավությունն արդեն վերականգնվել է, ապա թռչնի մսի մոտ 55%-ը դեռ շարունակում է ներկրվել: ՀՀ գյուղատնտեսության նախարարը տեղեկացրել է, որ մշակվել է թռչնարտադրության զարգացման ծրագիր: Ս. Կարապետյանը նաև հայտարարել է, որ անասնաբուծության մյուս ճյուղերում՝ խոշոր և մանր եղջերավոր անասուններ, Հայաստանն աճի տեմպով առաջ է ԱՊՀ մյուս հանրապետությունների համեմատ:

Պատգամավոր Վ. Բաղդասարյան իր հերթին նշել է, որ գյուղատնտեսությանը հատկացվող բարձր տոկոսադրույքներով վարկերը չեն նպաստում գյուղատնտեսության զարգացմանը, մարզերում առկա է սպանդանոցների կարիք, դրսից ներմուծվող միսը կրկնակի էժան է տեղականի համեմատ և ավելի մրցակցային: