Միքայել Արամյանցի թոռն ու ծոռը ՀՀ Սփյուռքի նախարարությունում

ՀՀ Սփյուռքի նախարար Հրանուշ Հակոբյանն ընդունեց լոնդոնաբնակ Ալեքսանդր Ջանոևին և նրա ընտանիքի անդամներին:

Ալեքսանդր Ջանոևը հայ մեծ բարերար Միքայել Արամյանցի դստեր որդին է, ներկայում ապրում է Անգլիայում: Հայաստան է ժամանել մասնավոր այցով, նրա պատվերով վավերագրական ֆիլմ է նկարահանվում՝ նվիրված հայ գործչի կյանքին ու գործունեությանը: Առաջիկայում Ախթալայի դպրոցը կանվանակոչվի Մ. Արամյանցի անունով:

Առավոտյան Արամյանցի հետնորդներն այցելել էին ՀՀ սփյուռքի նախարարության նախաձեռնությամբ և ջանքերով ստեղծված հայ բարերարների ճեմուղին, որտեղ տեղակայված է նաև Մ. Արամյանցի արձանը:

Ալ. Ջանոևը նախարարին փոխանցեց այն ոգևորությունն ու հպարտությունը, որն ունեցել է՝ հայ բարերարների ճեմուղում տեսնելով պապի արձանը:

ՀՀ սփյուռքի նախարար Հրանուշ Հակոբյանը ողջունեց հյուրերին՝ փաստելով, որ Ալ. Ջանոևի այցը Հայաստան ենթադրում է, որ Արամյանցները վերադառնում են իրենց արմատներին:

Նախարար Հակոբյանը հյուրերին տեղեկացրեց, որ առաջիկայում ի թիվս մյուս նշանավոր հայ բարերարների, կշարունակվի Միքայել Արամյանցի ազգանվեր գործի հանրահռչակման գործընթացը, նախատեսվում է գրքի տպագրության աշխատանքը, որում կներգրավվի նաև Ջանոևների ընտանիքը՝ ներկայացնելով բացառիկ լուսանկարներ, փաստաթղթեր: