Տիգրան Սարգսյան. Գոմեշի միս ներմուծող 5 ընկերությունների հետ ես որևէ առնչություն չունեմ

Վարչապետ Տիգրան Սարգսյանն այսօր կառավարության հերթական նիստից հետո Սննդի անվտանգության պետական ծառայության պետ Աբրամ Բախչագուլյանին խնդրեց ներկայացնել գոմեշի մսի ներմուծման հետ կապված իրավիճակը. «Քանի որ քաղաքական սպեկուլյացիաներ կան այս թեմայի շուրջ, դրա դեմ պայքարելու լավագույն ձևը հանրությանը ամբողջական տեղեկատվություն ներկայացնելն է»,-նշեց վարչապետը:

Աբրամ Բախչագուլյանը, ներկայացնելով իրավիճակը, հայտնեց, որ 2011-ի ընթացքում Հնդկաստանից Հայաստան ներմուծվել է 10 324տոննա 930կգ  գոմեշի մսի բրիկետներ 6 կազմակերպության կողմից:

«Ալեքս-Գրիգ» ՍՊԸ-ն ներմուծել է 61.2 տոկոս ծավալ, «Պարգև» ՍՊԸ-ն՝ 17 տոկոս, «Մոգոնատ» ՍՊԸ-ն՝ 9.5 տոկոս, «Արմեն Համիկ եղբայրներ» ՍՊԸ-ն՝ 6.5 տոկոս, «Ունիվերսալ ավան» ՍՊԸ-ն՝ 3.5 տոկոս և «Մուշ» ՍՊԸ-ն՝ 2.3 տոկոս:

2012թ. 9 ամիսների ընթացքում Հայաստան է ներմուվել 5 284 տոննա 651 կգ գոմեշի մսի բրիկետներ, 5 կազմակերպության կողմից:

«Պարգև» ՍՊԸ-ն` 34.23 տոկոս, «Արմեն Համիկ եղբայրներ» ՍՊԸ-ն՝ 23.52 տոկոս, «Ալեքս-Գրիգ» ՍՊԸ-ն՝ 18.14 տոկոս, «Սանսեր գրուպ» ՍՊԸ-ն՝ 13.5 և «Ունիվերսալ ավան» ՍՊԸ-ն՝ 11.6 տոկոս:

«Գոմեշի միս է ներմուծվում այն կազմակերպությունների կողմից, որոնք ունեն մսի արտադրության առնվազն տասը տարվա աշխատանքային փորձ, ընդհանուր մեկ արտադրության տարածքում տեղակայված են միջազգային ստանդարտներին համապատասխան սեփական սպանդանոց, մսի վերամշակման արտադրամաս և սառցարան», - նշեց Բախչագուլյանը:

Բախչագուլյանի խոսքից հետո վարչապետ Տիգրան Սարգսյանը հարց ուղեց, թե արդյոք այդ ընկերությունները կատարում են իրենց հարկային պարտավորություններն ամբողջությամբ: Բախչագուլյանը հարցին ի պատասխան ասաց, որ ուսումնասիրություններ են անցկացվում և առանձին կներկայացվեն:

Վարչապետը կարևորեց խնդիրը ուշադրության կենտրոնում պահելը. «Հայտնի քաղաքական ուժերը փորձում են զրպարտել՝ ինձ կապելով այս ընկերությունների հետ: Թվարկված 5 ընկերությունների հետ որևէ առնչություն ես չունեմ. բացարձակապես՝ ոչ ընկերներ, ոչ բարեկամներ», - ասաց վարչապետը՝ հավելելով, որ թվարկված 5 ընկերությունների սեփականատերերի անունները «հայտնի անուններ են մեր երկրում»: