Ասուլիսին արծարծվեցին զբոսաշրջությանը վերաբերող մի շարք պլաններ

Սեպտեմբերի 27-ին, «Նովոստի» միջազգային մամուլի կենտրոնում տեղի ունեցավ մամուլի ասուլիս՝ ՀՀ էկոնոմիկայի փոխնախարար Արա Պետրոսյանի, Հայաստանում ՌԴ արտակարգ և լիազոր դեսպան Վյաչեսլավ Կովալենկո, Հայաստանում Ռոսսոտրուդնիչեստվոյի ներկայացուցչության ղեկավար Վիկտոր Կրիվոպուսկով, Տուրիզմի հայկական ինստիտոուտի տնօրեն Ռոբերտ Մինասյանի մասնակցությամբ:

Ասուլիսի թեմաներն էին՝

Հայաստանի և Ռուսաստանի միջև դիվանագիտական հարաբերությունների հաստատման 20-ամյա հոբելյանին նվիրված Հայաստանի տարածքում գիտական զբոսաշրջային առաջին համատեղ արշավ

«Համամարդկային արժեքները և մշակութային բազմազանությունը 21-րդ դարում. զբոսաշրջության նշանակությունը» խորագրով միջազգային համաժողով և ԱՊՀ զբոսաշրջության խորհրդի հերթական նիստ /18-19 հոկտեմբեր/

Զբոսաշրջության համաշխարհային օր

Հայաստանի տարածքում գիտական զբոսաշրջային առաջին համատեղ արշավ

ՀՀ էկոնոմիկայի նախարարության և ՌԴ դեսպանատան և հովանու ներքո սեպտեմբերի 30-ից հոկտեմբերի 9-ը, Տուրիզմի ռուսական միջազգային ակադեմիայի (ՏՌՄԱ) և Տուրիզմի հայկական ինստիտուտի (ՏՀԻ) (ՏՌՄԱ–ի մասնաճյուղ)՝ նախաձեռնությամբ Հայաստանում կանցկացվի գիտական զբոսաշրջային առաջին համատեղ արշավը՝ նվիրված հայ-ռուսական դիվանագիտական հարաբերությունների հաստատման 20-ամյա հոբելյանին:

Գիտարշավը կմեկնարկի Երևան քաղաքից և կընդգրկի Գյումրի, Դիլիջան, Սևան, Գորիս, Կապան, Մեղրի, Օշական, Էջմիածին քաղաքները /1600կմ/:

Արշավի հիմնական խնդիրներից մեկը երիտասարդական զբոսաշրջության զարգացումն է՝ Հայաստանի և Ռուսաստանի միջև բարեկամական հարաբերությունների ամրապնդմանը և խորացմանը աջակցելու նպատակով։

Այն նաև նպատակ ունի բացահայտել նոր զբոսաշրջային ռեսուրսներ, նպաստել նոր մրցունակ զբոսաշրջային արդյունքների ձևավորմանը և ռուսական շուկային պատշաճ ներկայացմանը:

Գիտարշավի ռազմավարության մեջ մեծ տեղ է հատկացված հայ և ռուս եկեղեցիների բարեկամության, ինչպես նաև կրոնական սրբավայրերի բացահայտման և զբոսաշրջային երթուղիներում դրանց ընդգրկման խնդիրներին:

Գիտարշավի ընթացքում հավաքագրված նյութերը կուսումնասիրվեն, դրանց հիման վրա կպատրաստվի գիտական արդյունքների հաշվետվություն, որը կուղարկվի ռուսական և հայկական աշխարհագրական ընկերություններ և ՅՈՒՆԵՍԿՕ, կհրատարակվի մենագրություն:

Զբսաշրջության համաշխարհային օր

Զբոսաշրջության համաշխարհային օրը նշվում է 1979 թվականից սկսած յուրաքանչյուր տարի սեպտեմբերի 27-ին, այն բանից հետո, երբ Զբոսաշրջության համաշխարհային կազմակերպության գործադիր խորհուրդն Իսպանիայի Տոռեմոլինոս քաղաքում 1979թ. սեպտեմբերին կայացած իր 3-րդ նստաշրջանի ընթացքում առաջարկեց յուրաքանչյուր տարի հիշատակել Զբոսաշրջության համաշխարհային կազմակերպության կանոնադրության հաստատման օրը (1970թ. սեպտեմբերի 27-ին):

Զբոսաշրջության համաշխարհային օրվա հիմնական նպատակն է՝ բարձրացնել համաշխարհային հանրության իրազեկությունը զբոսաշրջության և դրա սոցիալական, մշակութային, քաղաքական և տնտեսական արժեքների կարևորության վերաբերյալ: Հայաստանը 1997 թվականից դառնալով Զբոսաշրջության համաշխարհային կազմակերպության լիիրավ անդամ շարունակական հետևում է վերջինիս կողմից միջազգայնորեն ընդունված ընդհանուր մոտեցումներին. 2009 թվականից զբոսաշրջության համաշխարհային օրվան նվիրված տոնակատարությունը ընդգրկվում է ՀՀ զբոսաշրջության տարեկան զարգացման ծրագրերում (որոնք հաստատվում են ՀՀ կառավարության որոշմամբ):

Այս տարի զբոսաշրջության համաշխարհային օրը նշվելու է հոկտեմբերի 1-ին:

Միջոցառման շրջանակներում արդեն 4-րդ տարին է զբոսաշրջության բնագավառի մի շարք հաստատություններ և նվիրյալներ' ոլորտում նշանակալից ներդրումների և ձեռքբերումների համար պարգևատրվում են ՀՀ վարչապետի շնորհակալագրերով, ՀՀ էկոնոմիկայի նախարարության ոսկե մեդալով և ՀՀ էկոնոմիակայի նախարարի շնորհակալագրերով:

Համամարդկային արժեքները և մշակութային բազմազանությունը 21-րդ դարում. զբոսաշրջության նշանակությունը» խորագրով միջազգային համաժողով

ՀՀ էկոնոմիկայի նախարարության և Զբոսաշրջության Համաշխարհային Կազմակերպության (ՄԱԿ ԶՀԿ) համագործակցության շրջանակներում 2012 թվականի հոկտեմբերի 18-19-ը Երևանում կկայանա «Համամարդկային արժեքները և մշակութային բազմազանությունը 21-րդ դարում. զբոսաշրջության նշանակությունը» խորագրով միջազգային համաժողով:

Համաժողովի նպատակն է՝ ընդգծել պատասխանատու զբոսաշրջության, համամարդկային արժեքների և մշակութային բազմազանության կապը՝ առանձնացնելով կրոնական և միջմշակութային երկխոսության, մշակութային ժառանգության, աղքատության նվազեցման և զբոսաշրջության բնագավառին առնչվող կորպորատիվ սոցիալական պատասխանատվության բնագավառների լավագույն փորձը, ինչպես նաև հրապարակել հռչակագիր (Երևանյան հռչակագիր)՝ միջմշակութային երկխոսության և մշակութային բազմազանության կարևորության վերաբերյալ՝ խրախուսելով պատասխանատու զբոսաշրջության զարգացումը և համամարդկային արժեքների հանդեպ հարգանքը։

Հռչակագիրն էապես կնպաստի զբոսաշրջության կայուն զարգացման միջոցով համամարդկային արժեքների և մշակութային բազմազանության արժեվորմանը, ամրապնդմանն ու զարգացմանը, ինչպես նաև վերոնշյալ գործընթացներին Հայաստանի ակտիվ ներգրավմանը:

Համաժողովի ընթացքում կկազմակերպվի նաև հատուկ նստաշրջան՝ նվիրված զբոսաշրջության համընդհանուր սոցիալական պատասխանատվությանը, որի ավարտին մասնակից մասնավոր հատվածի ներկայացուցիչներին՝ կազմակերպություններին, ասոցիացիաներին, կառաջարկվի ստորագրել Private Sector Commitment to the UNWTO Global Code of Ethics for Tourism(մասնավոր հատվածի՝ զբոսաշրջության էթիկայի համաշխարհային արժեքների նկատմամբ պարտավորությունների ստանձնում) փաստաթուղթը:

Համաժողովի վերաբերյալ առավել մանրամասն տեղեկությունների/ ծրագիր, քննարկումների թեմաներ, ելույթներ և այլն/ համար կարող եք այցելել www.tourismevents.am պաշտոնական կայքէջը, որը հատուկ գործարկվել է համաժողովի համար:

Վիճակագրական տվյալներ

Ըստ ստացված հաշվետվությունների տվյալների և հետազոտությունների արդյունքում ձևավորված փորձագիտական գնահատումների, 2012թ. հունվար-հունիսին հանրապետություն են ժամանել 281034 զբոսաշրջիկներ, կամ 2011թ. նույն ժամանակաշրջանի նկատմամբ ցուցանիշն աճել է 5.1%:

Ըստ հյուրանոցային տնտեսություններից ստացված հաշվետվությունների տվյալների՝ 2012թ. հունվար-հունիսին ՀՀ այցելած զբոսաշրջիկների 20.5%-ը բաժին է ընկել ԱՊՀ երկրներին, 36.9%-ը՝ ԵՄ երկրներին և 42.6%՝ այլ երկրներին: