Սաակաշվիլիի վարչակարգի վերընտրումով ջավախահայության իրավունքների ոտնահարումը նոր թափ կառնի. ԶԼՄ-ներ

Վրացական Սամցխե-Ջավախեթի շրջանի հայկական «Երկիր» հասարակական կազմակերպությունը Վրաստանում խորհրդարանական ընտրություններին ընդառաջ հանդես է եկել հայտարարությամբ, որում  նշել է գալիք ընտրություններին կեղծումների անթույլատրելիությունը:
Ինչպես հայտնվում է կազմակերպության՝ Регнум գործակալությանը տված հաղորդագրության մեջ, Սաակաշվիլիի ղեկավարած իշխող կուսակցությունը, որն այսօր ձգտում է վերընտրվել խորհրդարանում, ոչ միայն լուծում չի տվել Ջավախքի խնդրին, այլև հակառակը՝ զգալիորեն սահմանափակել է ջավախահայության քաղաքացիական, քաղաքական, լեզվական և կրթական իրավունքները:

«Ջավախքում սկսել են ավելի խստորեն կիրառվել այն օրենքները, որոնք վերաբերում են վրացերենին՝ որպես հասարակական կյանքի բոլոր ոլորտներում միակ և անայլընտրանքային լեզվի: Այդ պատճառով վրացերենի գերազանց չիմացության պատրվակով պետական հաստատություններից հեռացվում են պաշտոններ զբաղեցնող ջավախահայերը, որոնց փոխարինում են էթնիկ վրացիներ: Քայլեր են ձեռնարկվում հայալեզու դպրոցական կրթությունը լուծարելու ուղղությամբ, աստիճանաբար քչանում են հայերեն լեզվի դասաժամերը: Վրացական իշխանությունները բռնության միջոցներով ճնշում են ջավախահայության հասարակական-քաղաքական կյանքը:

Սաակաշվիլիի վարչակարգը ռեպրեսիաների է ենթարկում ջավախահայության խնդիրն արծարծող ջավախքցի ցանկացած գործչի: Վրացական ուժային կառույցների ուղղակի կամ անուղղակի ճնշման, քրեական պատասխանատվության ենթարկելու սպառնալիքների ներքո 2008-ից մինչ օրս տասնյակ ջավախահայ քաղաքական գործիչներ և ակտիվիստներ ստիպված են եղել լքել երկիրը կամ դադարեցնել իրենց քաղաքական գործունեությունը։

Սաակաշվիլիի վարչակարգը պատասխանատու է Ջավախքում տիրող անմխիթար իրավիճակի համար: Ջավախքի հայությունը լավ է գիտակցում, որ իշխող կուսակցության վերընտրվելու դեպքում ջավախահայերի տարրական իրավունքների ոտնահարման քաղաքականությունը ոչ միայն չի դադարի, այլև կշարունակվի նոր թափով:

Ջավախահայության հիմնական քաղաքական իրավունքներից է պետական և տեղական ինքնակառավարման մարմիններում առաջադրվելու իրավունքը, որը, ինչպես և մյուս նրանց իրավունքները, ոտնահարվում են Սաակաշվիլիի վարչակարգի կողմից: Այս բոլորն ապացուցում է, որ Սաակաշվիլին պատրաստ է կեղծել հայաբնակ տարածքներում ընտրությունների արդյունքները, ինչպես արել է 2006, 2008 և 2010թթ.»:

Հաշվի առնելով վերոշարադրյալը՝ «Երկիր» կազմակերպությունը պահանջում է վրացական իշխանություններից ընտրությունների արդյունքները հաշվելիս զերծ մնալ ջավախահայության ընտրական իրավունքների ոտնահարումներից և թույլ չտալ ընտրակեղծիքներ. ասվում է ջավախահայության հայտարարության մեջ:

Հիշեցնենք, որ  հոկտեմբերի 1-ին Վրաստանում կայանալու են խորհրդարանական ընտրություներ: