Միջոցների աննպատակ օգտագործման յուրաքանչյուր փորձ կարժանանա ամենախիստ վերաբերմունքի. գյուղնախարար

ՀՀ գյուղատնտեսության նախարարության ստորաբաժանումներում շարունակվում են սեպտեմբերի 15-ին ՀՀ կառավարությունում հրավիրված խորհրդակցության ժամանակ ՀՀ Նախագահ Սերժ Սարգսյանի կողմից գործադիր մարմինների ղեկավարներին տրված հանձնարարականների, վերջիններիս շրջանակներում կոլեկտիվների բյուջետային և ֆինանսական գործունեության բարելավման ուղղությամբ ձեռնարկվող քայլերի և միջոցառումնների քննարկումները:

Հերթական քննարկումներն այսօր «Գյուղատնտեսական Ծրագրերի իրականացման Գրասենյակ» Պետական հիմնարկում և «Հայանտառ» Պետական ոչ առևտրային կազմակերպությունում էին: Խորհրդակցություններին մասնակցեց և համակարգում հարձնարարականների կատարման մասին դիտարկումներով հանդես եկավ ՀՀ գյուղատնտեսության նախարար Սերգո Կարապետյանը:

Նշվածի համատեքստում անդրադառնալով գյուղատնտեսական ծրագրերի իրականացման գրասենյակի գործունեության մեջ նման շեղումների հնարավորությանը, նախարարը ընդգծեց. «Քանի որ ԾԻԳ-ը բազմաթիվ և մեծ ծրագրեր է իրականացնում, պետք է ըստ ամենայնի հասնել օգտագործված միջոցների մաքսիմալ հատույցին: Ծախսված յուրաքանչյուր դրամն ու լուման խիստ նպատակային արդյունք պետք է ունենան: Միջոցների աննպատակ օգտագործման կամ փոշիացման յուրաքանչյուր փորձ պետք է կանխվի, բացառվի և արժանանա ամենախիստ վերաբերմունքի»:

Նույնպիսի անմիջական գնահատականներ հնչեցին «Հայանտառ» ՊՈԱԿ-ի գործունեության վերաբերյալ: «Ապօրինի ծառահատումների, անտառների բուժման և վերականգնման համար տրամադրված միջոցների ոչ նպատակային օգտագործման մասին քննադատությունները շարունակվում են: Նշանակում է շեղումներ կան պետական անտառների և անտառային հողերի օգտագործման մասին գործող կարգից, որի համար անմիջական պատասխանատվություն կրող պաշտոնյաները պետք է արժանանան համապատասխան և խիստ վերաբերմունքի»,- ասել է նախարարը՝ պահանջելով այստեղ նույնպես ուշադրության կենտրոնում պահել ծախսվող բոլոր միջոցները:

Նախարարը խստիվ հանձնարարեց ամենասեղմ ժամկետներում հասնել օրենսդրության տառին համահունչ մրցակցային, արդյունավետ և թափանցիկ գնման գործընթացների: Հանձնարարվեց նաև հանգամանորեն քննարկել արծածված հարցերը և ներկայացնել նշված խնդիրների լուծման միջոցառումների ժամանակացույց:

Մեկ այլ հանձնարարականով «Հայանտառ» ՊՈԱԿ-ի ղեկավարներներին պարտավորեցվեց նման խորհրդակցություններ անցկացնել բոլոր անտառտնտեսություններում, հաստատել միջոցառումների ժամանակացույցներ նաև վերջիններիս համար:

Նախարարության կառուցվածքային և առանձնացված ստորաբաժանումների պատասխանատուներին հանձնարարվեց հնարավորինս ապահովել գործունեության թափանցիկությունը, հանրային հետաքրքրություն ներկայացնող հարցերի վերաբերյալ ժամանակին և անհրաժեշտ տեղեկատվություն տրամադրելով ԶԼՄ-ներին և հասարակական կազմակերպություններին: