2012թ.-ի առաջին կիսամյակում ՀՀ արտաքին առևտուրն աճել է

Ըստ ՀՀ Կենտրոնական բանկի հրապարակած տվյալների՝ 2012թ.-ի հունվար-հունիս ամիսներին Հայաստանից ապրանքների արտահանումը կազմել է 792 մլն ԱՄՆ դոլար՝ նախորդ տարվա նույն ժամանակահատվածի համեմատ աճելով 12%: Այս տարվա նույն ժամանակահատվածում ներմուծումն ավելացել է 6%-ով՝ 1.7 մլրդ դոլարից դառնալով 1.8 մլրդ դոլար:

Ապրանքների արտահանման մեջ գերակշիռ մասը՝ 62.1%-ը, կազմում են միջանկյալ սպառման ապրանքները, որոնցից 2012թ.-ի հունվար-հունիսին աճել են հատկապես անմշակ ոսկու (59.7%-ով) և ցինկի հանքաքարի (30.2%-ով) արտահանման ծավալները, իսկ նվազել են ալյումինե փայլաթիթեղի (20.2%-ով), երկաթամիահալվածքի (17.3%-ով) և պղնձի հանքաքարի (13.2%-ով) արտահանման ծավալները: Ներմուծման մեջ միջանկյալ ապրանքների կշիռը կազմում է 34.0%:

ԱՊՀ անդամ երկրներ արտահանվող ապրանքների ծավալներն ավելացել են 47.9 մլն ԱՄՆ դոլարով, որի մեծ մասը՝ 42.6 մլն դոլարը, բաժին է ընկնում Ռուսաստանի Դաշնությանը: Զգալիորեն աճել է արտահանումը դեպի Բելգիա՝ 35.2 մլն ԱՄՆ դոլարով, Գերմանիա՝ 21.1 մլն դոլարով, Շվեյցարիա՝ 16.4 մլն դոլարով և Վրաստան՝ 16.1 մլն դոլարով: Միաժամանակ մոտ 36.4 մլն դոլարով կրճատվել է արտահանումը դեպի Բուլղարիա և 19.6 մլն դոլարով՝ դեպի Նիդերլանդներ:

ԱՊՀ անդամ երկրներից ներմուծումը (ըստ ապրանքների ծագման երկրի հայտանիշի) աճել է 38.3 մլն ԱՄՆ դոլարով: Ընդ որում ներմուծման էական աճ գրանցվել է Ռուսաստանի Դաշնությունից՝ 73.5 մլն դոլար: «Այլ երկրներ» խմբից ներմուծումն աճել է Բրազիլիայից՝ 26.8 մլն դոլարով, Չինաստանից՝ 19.9 մլն դոլարով, Շվեյցարիայից՝ 18.2 մլն դոլարով, Ճապոնիայից՝ 15.6 մլն դոլարով և Իրանից՝15.1 մլն դոլարով: Միևնույն ժամանակ էականորեն նվազել է ներմուծումը Ղազախստանից՝ 18.2 մլն դոլարով, Ուկրաինայից՝ 17.7 մլն դոլարով, Վրաստանից՝ 16.0 մլն դոլարով և Ավստրիայից՝ 15.7 մլն դոլարով: