Այս տարի ՀՀ-ում դրամական հոսքերն աճել են

Ըստ ՀՀ կենտրոնական բանկի հրապարակած տվյալների 2012-ի հունվար-հունիսին ՀՀ-ում դրամական հոսքերը կազմել են 707.6 մլն ԱՄՆ դոլար՝ նախորդ տարվա նույն ժամանակահատվածի համեմատ աճելով 9.8%-ով: Սեզոնային աշխատողների կողմից ստացված զուտ աշխատավարձը նախորդ նույն ժամանակահատվածի համեմատ աճել է 24.5 մլն դոլարով՝ կազմելով 322 մլն դոլար, տնային տնտեսությունների ընթացիկ տրանսֆերտների ներհոսքն աճել է 29.0 մլն դոլարով՝ կազմելով 354.8 մլն դոլար 2011թ.-ի նույն ժամանակահատվածի՝ 325.7 մլն դոլարի դիմաց: Ինչ վերաբերում է մասնավոր հատվածի կապիտալ տրանսֆերտներին, ապա այս ժամանակահատվածում կապիտալ տրանսֆերտների ներհոսքն աճել է 9.7 մլն դոլարով և կազմել 30.8 մլն դոլար: Դրամական փոխանցումները 2-րդ եռամսյակում կազմել են 412.8 մլն դոլար՝ 2011թ.-ի 2րդ եռամսյակի նկատմամբ աճելով 7.5%-ով:

2012թ.-ի հունվար-հունիս ամիսներին ՀՀ բանկային համակարգով ֆիզիկական անձանց ոչ առևտրային նպատակով իրականացված դրամական փոխանցումների ներհոսքը կազմել է 664 մլն դոլար, իսկ արտահոսքը՝ 132 մլն դոլար: Նշված ժամանակահատվածում վերոնշյալ փոխանցումները (ինչպես ներհոսքը, այնպես էլ ներհոսքը) իրականացվել են հիմնականում Ռուսաստանի (համապատասխանաբար 83% և 57%) և ԱՄՆ-ի (համապատասխանաբար 5% և 9%) հետ:

Պետական հատվածի տրանսֆերտների զուտ ներհոսքը այս տարվա հունվար-հունիսին, նախորդ տարվա նույն ժամանակահատվածի համեմատ, նվազել է25.6 մլն դոլարով և կազմել 52.5 մլն դոլար, որի 65.5%-ը կամ 34.4 մլն դոլարը ընթացիկ պետական տրանսֆերտներն են, իսկ մնացած 18.1 մլն դոլարը՝ կապիտալ տրանսֆերտները:

Ֆինանսական հաշվի դրական մնացորդը 2012թ.-ի հունվար-հունիս ամիսներին, նախորդ տարվա նույն ժամանակահատվածի համեմատ, նվազել է 14.4%-ով՝ 657.2 մլն դոլարից դառնալով 562.9 մլն դոլար: Իսկ այս տարվա 2-րդ եռամսյակում ֆինանսական հաշիվը կազմել է 262.6 մլն դոլար, որը նախորդ տարվա նույն եռամսյակի նկատմամբ նվազել է 38.9 մլն դոլարով կամ 12.9%-ով: