ՀՀ ուղղակի ներդրումները նվազել են

Ըստ ՀՀ կենտրոնական բանկի հայտնած տվյալների՝ 2012թ.-ի 1-ին կիսամյակում, նախորդ տարվա նույն ժամանակահատվածի համեմատ, ՀՀ ուղղակի ներդրումների ներհոսքը նվազել է 106.4 մլն դոլարով և կազմել 179 մլն դոլար, որից 21.2 մլն դոլարը ՀՀ ձեռնարկությունների բաժնետիրական կապիտալում կատարված ներդրումներն են, 138.2 մլն դոլարը՝ վերաներդրված եկամուտը, իսկ 20 մլն դոլարը՝ միջֆիրմային վարկերը:

Իրական հատվածում կատարված ուղղակի ներդրումները հիմնականում ուղղվել են հեռահաղորդակցության և հանքագործական արդյունաբերության ոլորտներ:

2012թ.-ի առաջին կիսամյակի ընթացքում պորտֆելային ներդրումների ակտիվներն աճել են 0.3 մլն դոլարով, իսկ պարտավորությունները՝ նվազել 0.9 մլն դոլարով: Արդյունքում պորտֆելային ներդրումների զուտ արտահոսքը կազմում է 1.1 մլն դոլար՝ անցած տարվա նույն ժամանակահատվածի 14.9 մլն դոլար զուտ արտահոսքի փոխարեն:

Այլ ներդրումների զուտ աճը այս տարվա առաջին կիսամյակում կազմել է 226.3 մլն դոլար՝ նախորդ տարվա նույն ժամանակահատվածի 262.5 մլն դոլարի փոխարեն: Ակտիվների՝ 27.8 մլն դոլար նվազումը հիմնականում պայմանավորված է առևտրային բանկերի «Վարկեր» հոդվածի՝ 60.4 մլն դոլար նվազմամբ: Պարտավորությունների՝ 198.4 մլն դոլար աճը մեծամասամբ պայմանավորված է պետական կառավարման մարմինների և առևտրային բանկերի «Վարկեր» հոդվածի աճով՝ համապատասխանաբար 175.3 մլն դոլար և 150.9 մլն դոլար:

Պարտավորություններում «Դրամական միջոցներ և ավանդներ» հոդվածը նվազել է 76.0 մլն դոլարով, որն ամբողջությամբ պայմանավորված է առևտրային բանկերի կողմից ոչ ռեզիդենտներից ներգրաված ավանդների նվազմամբ (Նախորդ տարի նույն ժամանակահատվածում ավանդների աճը կազմել էր 116.8 մլն դոլար):

Այս տարվա առաջին կիսամյակում պահուստային ակտիվները նվազել են 169.9 մլն դոլարով՝ նախորդ տարվա 133.1 մլն դոլարի փոխարեն: