ՀՀ համախառն արտաքին պարտքի մեծ մասը պատկանում է պետական կառավարման մարմիններին

Ըստ ՀՀ կենտրոնական բանկի հայտնած տվյալների՝ ՀՀ համախառն պարտքը 2012թ.-ի 2-րդ եռամսյակի վերջի դրությամբ կազմել է 7,499.4 մլն ԱՄՆ դոլար, որի 51.2%-ը կամ 3,840.0 մլն դոլարը Կառավարության և Կենտրոնական բանկի արտաքին պարտքն է (արտաքին պետական պարտք), 22.4%-ը կամ 1,676.9 մլն դոլարը ՝ առևտրային բանկերի և վարկային կազմակերպությունների պարտքը՝ ներառյալ միջֆիրմային վարկերը, իսկ 26.4%-ը կամ 1,982.5 մլն դոլարը՝ այլ մասնավոր հատվածի պարտքը՝ ներառյալ միջվիրմային վարկերը:

ՀՀ համախառն արտաքին պարտքը 2012թ.-ի 2-րդ եռամսյակի վերջին, նույն տարվա առաջին եռամսյակի համեմատ, աճել է 154.3 մլն դոլարով, ինչը հիմնականում պայմանավորված է առևտրային բանկերի և վարկային կազմակերպությունների արտաքին պարտքի աճով: ՀՀ կառավարության և կենտրոնական բանկի արտաքին վարկերն այս տարվա երկրորդ եռամսյակի վերջի դրությամբ կամել են 3,695.4 մլն դոլար, որից 3,085.4 մլն դոլարը ՀՀ կառավարությանը տրված վարկերն են, իսկ 610.1 մլն դոլարը՝ ՀՀ կենտրոնական բանկին:

Այս տարվա երկրորդ եռամսյակի ընթացքում արտաքին պետական պարտքի ներհոսքը կազմել է 158.6 մլն դոլար, որի 95.7%-ը կամ 151.9 մլն դոլարը բազմակողմանի պաշտոնական աղբյուրներից ներգրավված միջոցներն են: Ընդ որում, 2012թ.-ի երկրորդ եռամսյակի ընթացքում ՀՀ կառավարությունը ՀԱՄՀ-ից ECF վարկի գծով ստացել է 16 մլն ՀՓԻ (հատուկ փոխառության իրավունք), իսկ կենտրոնական բանկը՝ EFF վարկի գծով 17.5 մլն ՀՓԻ:

Երկկողմանի աղբյուրներից ստացված միջոցները կազմել են 6.8 մլն դոլար, որի մեծ մասը՝ 6.0 մլն դոլարը, ստացվել է Գերմանիայից:

2012թ.-ի երկրորդ եռամսյակի ընթացքում արտաքին պետական պարտքի հիմնական գումարի մարումները կազմել են 47.4 մլն դոլար, իսկ տոկոսավճարները՝ 18.6 մլն դոլար:

ՀՀ առևտրային բանկերի և վարկային կազմակերպությունների համախառն արտաքին պարտքը (ներառյալ՝ միջֆիրմային վարկերը) 2012թ.-ի երկրորդ եռամսյակի վերջին, նույն տարվա առաջին կիսամյակի վերջի համեմատ, աճել է 166.6 մլն դոլարով և կազմել 1,676.9 մլն դոլար: Այս տարվա երկրորդ եռամսյակի վերջի դրությամբ ՀՀ առևտրային բանկերի և վարկային կազմակերպությունների հիմնական վարկառու երկրներն են Ռուսաստանը՝ 21.9%, Լյուքսեմբուրգ՝ 9.1%, Գերմանիան՝ 6.3%: Վարկերի մոտ 31.8% տրվել է միջազգային կազմակերպությունների կողմից:

ՀՀ այլ մասնավոր հատվածի համախառն արտաքին պարտքը (ներառյալ՝ միջվարկային վարկերը) նվազել ՝ 66.0 մլն դոլարով և կազմել 1,982.5 մլն դոլար: Պարտքի 42.5%-ը կամ 843.3 մլն դոլարը կազմում են ներգրավված վարկերը, 46.4%-ը կամ 919.9 մլն դոլարը՝ միջֆիրմային վարկերը, իսկ մնացած 219.3 մլն դոլարը՝ այլ պարտավորությունները՝ ներառյալ առևտրային վարկերը: