14.6 մլն դոլարի օժանդակություն՝ Հայաստանին

2010թ. օգոստոսի 6-ին կնքվել են «Ամերիկայի Միացյալ Նահանգների կառավարության և Հայաստանի Հանրապետության կառավարության միջև ավելի մրցունակ և զանազանեցված մասնավոր հատվածի շուրջ օժանդակության մասին» և «Ամերիկայի Միացյալ Նահանգների կառավարության և Հայաստանի Հանրապետության կառավարության միջև առողջապահական և սոցիալական ծառայությունների արդյունավետության բարելավման շուրջ կնքված օժանդակության մասին» համաձայնագրերը, որոնցով նախատեսված էր ԱՄՆ-ի կառավարության կողմից ԱՄՆ-ի Միջազգային զարգացման գործակալության միջոցով ընդհանուր 56 միլիոն ԱՄՆ դոլարի օժանդակության տրամադրումը Հայաստանի Հանրապետության կառավարությանը՝ ավելի մրցունակ և զանազանեցված մասնավոր հատվածի ձևավորման, ինչպես նաև առողջապահական և սոցիալական ծառայությունների արդյունավետության բարելավման ուղղությամբ:

Այսօր՝ սեպտեմբերի 29-ին, ՀՀ էկոնոմիկայի նախարար Տիգրան Դավթյանը և ԱՄՆ ՄԶԳ տնօրեն Քարեն Հիլիարդը ստորագրել են Հայաստանին տրամադրվող ԱՄՆ օժանդակության չորրորդ տրանշը՝ տրամադրելով 9,6 միլիոն ԱՄՆ դոլարի օժանդակություն Հայաստանի տնտեսական աճի բարեփոխումների սատարման և 5 միլիոն ԱՄՆ դոլարի օժանդակություն՝ առողջապահական և սոցիալական բարեփոխումների սատարման նպատակով:

Տնտեսական զարգացման օժանդակության համաձայնագրի շրջանակներում ԱՄՆ ՄԶԳ-ն կնպաստի ավելի մրցունակ և զանազանեցված մասնավոր հատվածի զարգացմանը:

Ծրագիրը կստեղծի ավելի արդյունավետ ձեռնարկություններ ու արժեքային շղթաներ, կբարելավի քաղաքականության և կանոնակարգիչ միջավայրերը, կհզորացնի աշխատուժի հմտությունները և կբարելավի համագործակցությունը մասնավոր-պետական մարմինների միջև: Ի հավելումն, ծրագիրը կբարելավի հիմնական ենթակառուցվածքների՝ էներգետիկայի, ջրի և հեռահաղորդակցության ոլորտների քաղաքականությունը և կառավարումը:

Առողջապահական և սոցիալական բարեփոխումների օժանդակության համաձայնագրի շրջանակներում ԱՄՆ ՄԶԳ-ն կշարունակի աջակցել առողջապահական և սոցիալական ծառայությունների արդյունավետության բարելավման, ինչպես նաև առողջապահության և սոցիալական պաշտպանության ոլորտներում հանրային ծախսերի ավելացման հարցում: