Այս տարվա սեպտեմբերին պարենային ապրանքները թանկացել են 1.1%-ով

2012թ. սեպտեմբերին օգոստոսի համեմատ հանրապետությունում արձանագրվել է պարենային ապրանքների 1.1% գնաճ, ինչը մեծապես պայմանավորվել է կենդանական և բուսական յուղերի, հացամթերքի, բանջարեղենի և կարտոֆիլի ապրանքախմբերի 1.5-10.7% գնաճով: Դիտարկվող պարենային 13 ապրանքախմբերից 9-ում նշված ժամանակահատվածում գրանցվել է 0.2-10.7% գնաճ, 3-ում՝4.0-0.1% գնանկում, իսկ մեկում գների մակարդակը նախորդ ամսվա համեմատ մնացել է անփոփոխ:

Բանջարեղենի և կարտոֆիլի ապրանքախմբում 2012թ. սեպտեմբերին 2011թ. սեպտեմբերի համեմատ արձանագրվել է 9.7% գնանկում, իսկ 2012թ. օգոստոսի համեմատ՝ 10.7% գնաճ:

Հանրապետության դիտարկված 10 քաղաքներում 2012թ. սեպտեմբերին օգոստոսի համեմատ բանջարեղենի և կարտոֆիլի ապրանքախմբի գներն աճել են 2.2-17.9%-ով (գնաճի ամենաբարձր ցուցանիշներն արձանագրվել է ք. Վաղարշապատում), իսկ մեկում գրանցվել է 0.9% գնանկում: Մայրաքաղաքում բանջարեղենի և կարտոֆիլի ապրանքախմբի գներն աճել են 11.8 %-ով:

Այս տարվա սեպտեմբերին 2011թ. սեպտեմբերի համեմատ հացամթերքի ապրանքախմբում արձանագրվել է 7.1%, իսկ 2012թ. օգոստոսի համեմատ՝ 1.6% գնաճ:

2012թ. սեպտեմբերին օգոստոսի համեմատ բարձր տեսակի ալյուրի գինն աճել է 1.7%-ով, առաջին տեսակի ալյուրինը՝ 1.0%-ով, բարձր տեսակի հացինը՝ 1.4%-ով, առաջին տեսակի հացինը՝ 1.5%-ով, լավաշինը՝ 0.8%-ով, իսկ 2011թ. դեկտեմբերի համեմատ նշված ապրանքատեսակների գնաճը կազմել է համապատասխանաբար 17.3%, 8.9%, 7.2%, 3.7% և 4.6%:
Հանրապետության դիտարկված բոլոր քաղաքներում 2012թ. սեպտեմբերին օգոստոսի համեմատ արձանագրվել է հացամթերքի 0.6-2.5% գնաճ, այդ թվում, գնաճի ամենաբարձր ցուցանիշն արձանագրվել է ք. Վանաձորում: Մայրաքաղաքում հացամթերքի գներն աճել են 1.6 %-ով:

Կենդանական և բուսական յուղերի ապրանքախմբում 2012թ. սեպտեմբերին 2011թ. սեպտեմբերի համեմատ արձանագրվել է 0.5% գնանկում, իսկ 2012թ. օգոստոսի համեմատ՝1.5% գնաճ:

Այս տարվա սեպտեմբերին 2011թ. սեպտեմբերի համեմատ ձվի հանրապետական միջին գինը նվազել է 6.2%-ով, իսկ 2012թ. օգոստոսի համեմատ՝ գրանցվել է 1.0% գնաճ:

2012թ. սեպտեմբերին օգոստոսի համեմատ հանրապետությունում արձանագրվել է շաքարավազի՝ 0.2%, սուրճի, թեյի, կակաոյի՝ 0.2%, հրուշակեղենի՝ 0.2%, ոչ ոգելից խմիչքի՝ 0.2%, կաթնամթերքի 0.4% գնաճ:

Մրգի ապրանքախմբում 2012թ. սեպտեմբերին, 2011թ. սեպտեմբերի համեմատ, արձանագրվել է 13.2%, իսկ 2012թ. օգոստոսի համեմատ՝ 4.0% գնանկում:

Հանրապետության դիտարկված 9 քաղաքներում 2012թ. սեպտեմբերին օգոստոսի համեմատ մրգի գները նվազել են 15.1-0.8%-ով (գնանկման ամենաբարձր ցուցանիշն արձանագրվել է ք. Վաղարշապատում), իսկ մյուս 2 բնակավայրերում գրանցվել է 0.3-4.9% գնաճ: Մայրաքաղաքում մրգի գները նվազել են 2.4%-ով:

Մսամթերքի ապրանքախմբում 2012թ. սեպտեմբերին, 2011թ. սեպտեմբերի համեմատ, գրանցվել է 3.5% գնաճ, իսկ 2012թ. օգոստոսի համեմատ՝ 0.1% գնանկում: 2012թ. սեպտեմբերին օգոստոսի համեմատ հանրապետությունում արձանագրվել է ոչխարի, տավարի և խոզի մսերի՝ համապատասխանաբար 3.8%, 1.1% և 0.9% գնանկում: Միաժամանակ, թռչնի մսի գինն աճել է 1.1%-ով, հավի բդինը՝ 1.6%-ով, խոզապուխտինը՝ 1.9%-ով,բաստուրմայինը՝ 4.4%-ով:

Հանրապետության դիտարկված 7 քաղաքներում 2012թ. սեպտեմբերին օգոստոսի համեմատ մսամթերքի գները նվազել են 1.9-0.1%-ով, մյուս 4-ում գրանցվել է 0.1-1.4% գնաճ:

Այս տարվա սեպտեմբերին օգոստոսի համեմատ հանրապետությունում գրանցվել է ձկնամթերքի 0.3% գնանկում, իսկ այլ մթերքի ու ոգելից խմիչքի և ծխախոտի ապրանքախմբերում պահպանվել է գների նախորդ ամսվա մակարդակը: