Ծառայությունների ոլորտում արձանագրվել է 0.1% գնաճ

Բնակչությանը մատուցված ծառայությունների ոլորտում 2012թ. սեպտեմբերին օգոստոսի համեմատ արձանագրվել է սակագների 0.1% հավելաճ: Նշված ժամանակահատվածում հանրապետությունում գրանցվել է իրավական ու բանկային ծառայությունների սակագների՝ 0.1%, հանրային սննդի՝ 0.3%, բուժսպասարկման՝ 0.3%, մշակույթի ոլորտի՝ 0.3%, կենցաղային բնույթի՝ 0.4%, տրանսպորտի՝ 1.4%, կրթության համակարգի ծառայությունների սակագների՝ 4.8% հավելաճ: 2012թ. սեպտեմբերին, օգոստոսի համեմատ, բնակարանային-կոմունալ (պայմանավորված անապահով ընտանիքներին մատակարարվող բնական գազի սակագների սուբսիդավորման արդյունքում բնական գազի սակագների 1.4% նվազմամբ), և հանգստի կազմակերպման ծառայությունների սակագները նվազել են համապատասխանաբար 0.7% և 0.4%-ով, իսկ կապի ծառայությունների սակագների մակարդակը նախորդ ամսվա համեմատ մնացել է անփոփոխ:

Հանրապետության դիտարկված 7 քաղաքներում 2012թ. սեպտեմբերին օգոստոսի համեմատ արձանագրվել է ծառայությունների սակագների 0.1-0.7% հավելաճ, 2-ում՝ 0.2-0.1% նվազում, իսկ Երևան և Եղեգնաձոր քաղաքներում ծառայությունների սակագների մակարդակը նախորդ ամսվա համեմատ մնացել է անփոփոխ: