Գագիկ Բեգլարյանն ընդունել է Ասիական զարգացման բանկի պատվիրակությանը

Հայաստանի Հանրապետության տրանսպորտի եւ կապի նախարար Գագիկ Բեգլարյանը հոկտեմբերի 2-ին ընդունել է Ասիական զարգացման բանկի /ԱԶԲ/ պատվիրակությանը՝ ԱԶԲ-ի Հյուսիս-հարավ ծրագրի ղեկավար Արտո Ահոնենի գլխավորությամբ։

Հանդիպման ընթացքում քննարկվել են հյուսիս-հարավ ճանապարհային միջանցքի երրորդ տրանշի՝ Թալին-Գյումրի 45,7 կմ հատվածի բարելավման և վերակառուցման հայտը, ինչպես նաև առաջիկա մեկ տարվա ընթացքում Հյուսիս-հարավ ծրագրի ամբողջական եւ մանրամասն նախագծերի պատվիրման եւ պատրաստման հնարավորությունները: Հստակեցվել են նաև տրանշ 3-ով նախատեսված բանակցություններին եւ ստորագրվելիք վարկային համաձայնագրերին առնչվող հարցեր։

Գագիկ Բեգլարյանը հանձնարարել է սկսել ճանապարհահատվածի տեխնիկական ուսումնասիրության աշխատանքները, քանի որ այն բավականին բարդ և երկար ժամանակ պահանջող գործընթաց է:

«Աշխատանքները պետք է սկսել, պետք է կատարել տեխնիկական վիճակի ուսումնասիրություն, որպեսզի տեղավորվենք ժամկետների մեջ»,- ընդգծել է նախարարը:

Նախապատրաստական աշխատանքների ավարտից հետո կհայտարարվի մրցույթ՝ հյուսիս-հարավ ճանապարհային միջանցքի երրորդ տրանշի շինարարական աշխատանքների համար: