The Wall Street Journal. Ռուսաստանի հաղթանակը Վրաստանի խորհրդարանական ընտրություններում

Բեռլինում «Ժողովրդավարության պաշտպանության ֆոնդ»-ի (Foundation for Defense of Democracies) աշխատակից Ջեյմս Կերչիկը The Wall Street Journal պարբերականում հրապարկված իր հոդվածում, անդրադառնալով Վրաստանի խորհրդարանական ընտրություններին, մասնավորապես գրում է. «Վրաստանում հաղթանակ տարած ընդդիմադիր թեկնածու Բիձինա Իվանիշվիլին իր կարողության համար պարտական է Պուտինի ռեժիմին: Եվ չնայած երկրում կայացած ընտրությունները և, թվում է թե, արդեն մեկնարկած խաղաղ իշխանափոխութունը խոսում են երկրում ժողովրդավարության հաղթարշավի մասին, այնուամենայնիվ, դա նաև Վրաստանի հյուսիսային հարևան Ռուսաստանի հաղթանակն է, որը նոր կառավարության օրոք կարող է ուժեղացնել իր ազդեցությունն այդ երկրում:

Չնայած որ Սաակաշվիլիի օրոք սկիզբ առած Արևմուտքի հետ Վրաստանի սերտ համագործակցությունը չանդրադարձավ այդ ընտրություններում Սաակաշվիլիի պարտության վրա, այնուհանդերձ, այդ պարտությամբ Վրաստան-Արևմուտք հարաբերությունները կտուժեն: Բանը նրանում է, որ Իվանիշվիլին, որն իր ունեցվածքը դիզել է Մոսկվայում 1990-ական թթ. տեղի ունեցած տնտեսության սեփականաշնորհման արդյունքում, կձեռնարկի բոլոր հնարավոր քայլերը Մոսկվայի ազդեցությունը երկրում նորից ուժեղացնելու համար»,- գրում է Կերչիկը:

Այն, թե ինչ միջոցներով է Իվանիշվիլին կուտակել իր ունեցվածքը, միակ ապացույցը չէ, որ վկայում է Վրաստանի ապագա ռուսամետ քաղաքականության մասին: Իվանիշվիլին և նրա կուսակիցները մեկ անգամ չէ, որ իրենց հայտարարություններում արտահայտել են իրենց համակրանքը Ռուսաստանի նկատմամբ և հակակրանքը՝ ԱՄՆ-ի:

Economist-ին տված հարցազրույցում Իվանիշվիլին հայտնել է, որ Ռուսաստանն առավել ժողովրդավար հանրապետություն է, քան Վրաստանը, և բացի այդ՝ հենց Վրաստանն է 2008թ. պատերազմ սկսել Ռուսաստանի դեմ Հարավային Օսեթիայի համար: «Հաշվի առնելով Վրաստանի աշխարհաքաղաքական դիրքը և տարածքը՝ չի կարելի այդ պետությանը մեղադրել նման աշխարհաքաղաքականության մեջ, սակայն ՆԱՏՕ-ին և ԵՄ-ին անդամագրվելու գործընթացի դանդաղեցումը կարող է աղետի վերածվել վերջինիս համար:

Եթե Վրաստանը շարունակի գնալ Արևմտյան արժեքների ճանապարհով, նա կնմանվի հետխորհրդային պետություններին, ինչպիսիք են Չեխիան կամ Լեհաստանը, որոնք այժմ խորհրդային տոտալիտար վարչակարգից լիովին անցում են կատարել կայուն ժողովրդավարության, իսկ եթե ընտրի ռուսական զարգացման ուղին, նրան սպասում է Ուկրաինայի ու Բելառուսի ճակատագիրը. առաջինում իշխում է հանցագործ և ավտորիտար վարչակարգը, երկրորդում՝ դաժան բռնապետությունը»,-շարունակում է հոդվածագիրը:

«Կրեմլը տարիներ շարունակ փորձում էր ապակայունացնել իրավիճակը Վրաստանում և հեռացնել իշխանությունից նրա արևմտամետ ղեկավարությանն այն բանի համար, որ վերջինս հանդգնել էր սերտ կապեր հաստատել Արևմուտքի հետ: Այն, ինչը Մոսկվային չհաջողվեց անել ռազմական ճանապարհով, իրականություն դարձավ միլիարդատեր Իվանիշվիլիի միջոցով»,-եզրափակում է Կերչիկը: