ԿԲ-ն լկտիացել է. Հրանտ Բագրատյան

Այսօր՝ հոկտեմբերի 3-ին, ՀՀ Ազգային ժողովում դրամավարկային քաղաքականության 2011թ.-ի հաշվետվության քննարկումների ընթացքում ելույթ է ունեցել ՀՀ ազգային ժողովի պատգամավոր, ՀՀ նախկին վարչապետ Հրանտ Բագրատյանը:

Նա նշել է, որ 2005-ից այս կողմ, երբ ՀՀ Սահմանադրությունում հայտնվեց 83.3 հոդվածը, որով ՀՀ կենտրոնական բանկի հիմնական խնդիրն է դառնում գների կայունության ապահովումը, Կենտրոնական բանկը լկտիացել է, իսկ նախկին նախագահը կրակն է ընկել և փոշմանել դրա համար:

Հ. Բագրատյանը նշել է, որ աշխարհում ոչ մի տեսություն ներկայում չի պնդում, որ գների կայունությունը կարելի է ապահովել միայն մոնետար գործոններով: ՀՀ նախկին վարչապետը նշել է, որ գներն իրականում չեն կայունացել, քանի որ միջին գնաճը 7.7% է, իսկ ԿԲ-ն որպես հիմնական թիրախ ներկայացնում է 12-ամսյա գնաճը, որը կազմում է 4.7% է: Սակայն նույնիսկ այդ 7.7%-ը վստահելի չէ: Նա նշել է նաև, որ այսօրվա բանկային համակարգն ու օլիգարխիան ծանրացել են տնտեսության վրա, իսկ առևտրային բանկերը գերշահույթ են ստանում բարձր տոկոսադրույքների, ներգրավված ու տրամադրված միջոցների բարձր սփրեդի միջոցով:

Վարկերի տոկոսադրույքները չեն իջնում՝ 16-17% են, սակայն Հ. Բագրատյանի խոսքով, սպասարկումը և այլ ծախսերը հավելած 25% է: Նա մատնանշել է, որ երկրում 14% անկում է եղել, սակայն դրանից ոչ մի բանկ չի տուժել, քանի որ բանկերում ռիսկ չկա, որը դարձել է «թարախապալար այս պետության գլխին», և հիմնական պատճառը օլիգարխիան է:

Վերջում Հ. Բագրատյանը նշել է, որ առանց ՀՀ կենտրոնական բանկում արմատական փոփոխությունների հնարավոր չի լինի տնտեսական զարգացում ապահովել: