Հրանուշ Հակոբյանը պաշտոնական այցով Իրանում էր

ՀՀ սփյուռքի նախարար Հրանուշ Հակոբյանը պաշտոնական այցով մեկնել էր Իրանի Իսլամական Հանրապետություն, մասնակցելու Իրանում ՀՀ դեսպանատան կողմից կազմակերպված Հայաստանի Հանրապետության անկախության 21-րդ ամյակին նվիրված միջոցառումներին, հանդիպելու իրանահայ գործիչներին, լսելու իրանահայ համայնքի մտահոգություններն ու խնդիրները:

Թեհրան կատարած այցի շրջանակներում նախարար Հ. Հակոբյանը եղավ Թեհրանի առաջին հայկական Սուրբ Գևորգ եկեղեցում, մասնակցեց սուրբ պատարագին: Այնուհետև այցելեց «Էլպիս Ֆերեհյան» մանկապարտեզ և ծանոթացավ մանկապարտեզի 70-ամյա անցյալին, ներկա աշխատանքներին:

«Ալիք» օրաթերթի խմբագրատանը կայացած հանդիպման ընթացքում նախարարը ծանոթացավ խմբագրության, տպարանի գործունեությանը: Քննարկվեցին այն հիմնախնդիրները, որոնք այսօր ծառացած են Իրանում գործող հայկական թերթի առջև: Նախարարն արժևորեց թերթի գործունեությունը՝ որպես հայապահպանության ու ազգային գիտակցության կարևորագույն գործոն:

Նախարար Հ. Հակոբյանը, Իրանում ՀՀ արտակարգ և լիազոր դեսպան Գրիգոր Առաքելյանի և դեսպանատան աշխատակազմի ընկերակցությամբ այցելեց Թեհրանի հայոց ազգային առաջնորդարան: Ազգային առաջնորդարանի դահլիճում ողջույնի խոսք ասաց Թեհրանի հայոց թեմի առաջնորդ Տ. Սեպուհ արքեպիսկոպոս Սարգսյանը: Հանդիպման ընթացքում ունեցած ելույթում նախարար Հ. Հակոբյանը գոհունակություն հայտնեց Իրան կատարած այցի կապակցությամբ՝ կարևորելով Իրան-Հայաստան բարձր մակարդակի հարաբերութոյւնները: Նախարարը ներկայացրեց Սփյուռքի նախարարության ծավալած աշխատանքները՝ կարևորելով Սփյուռքի դերն ու գիտական, մասնագիտական ներուժի պատշաճ օգտագործումը: Նախարարը կարևորել է իրանահայ համայնքի պատմությունը գրի առնելու անհրաժեշտությունը: Հանդիպման վերջում նախարարը ոսկե մեդալով պարգևատրեց Թ. Հ. Թ. առաջնորդ Տ. Սեպուհ արք. Սարգսյանին, Իսլամական խորհրդարանում Թեհրանի և հարավային իրանահայության գործող պատգամավոր Ռոբերտ Բեգլարյանին հանձնեց պատվոգիր, Թ. Հ. Թ. Պատգամավորական ժողովի ատենապետ Գևորգ Աբուլյանին պարգևատրեց Վ. Սարոյանի անվան, Թ. Հ. Թ խորհրդի ատենապետ Էդուարդ Բաբախանյանին՝ Արշիլ Գորկու անվան մեդալներով:

Նախարար Հակոբյանը իրանահայ բանաստեղծ Վարանդ Քեշիշյանին հանձնեց ՀՀ նախագահի կողմից տրված Մովսես Խորենացու անվան շքանշանը:

Հաջորդ օրը ՀՀ սփյուռքի նախարարին ընդունեց իսլամական մշակույթի և առաջնորդության նախարար Սեյեդ Մուհամմադ Հուսեյնին: Հանդիպման ընթացքում իսլամական մշակույթի և առաջնորդության նախարարն անդրադարձավ իրանահայ համայնքին՝ մատնանշելով այն հատուկ հարգանքը, որն իրանցիները տածում են հայերի նկատմամբ:

Հանդիպման ընթացքում ՀՀ սփյուռքի նախարար Հրանուշ Հակոբյանը կարևորելով անդրադարձավ իրանահայ համայնքի դերակատարությանը՝ Իրան-Հայաստան բարեկամական սերտ հարաբերությունների կայացման և պահպանման հարցում:

Հոկտեմբերի 1-ին Սպահանի հայոց Թեմական խորհրդի հրավերով ՀՀ սփյուռքի նախարար Հրանուշ Հակոբյանը եղավ Նոր Ջուղայում: «Արարատ» միության մարզասրահին կից բացօթյա տարածքում տեղի ունեցած հանդիսության ժամանակ Սպահանի Հայոց Թեմական խորհրդի ատենապետ Նոել Մինասյանը խորհրդանշական համարեց նախարարի՝ նախարարության հիմնադրման քառամյակի օրը:

Ներկաներին իր պատգամն ուղղեց նախարար Հրանուշ Հակոբյանը՝ դրվատանքով արտահայտվելով Նոր Ջուղայի և նորջուղայեցու մասին՝ կարևորությամբ ընդգծելով անկախության 21 տարիների ընթացքում հաղթահարած մի շարք դժվարություններ և ձեռքբերումներ. «Մենք այսօր կարողացել ենք աշխարհին ներկայանալ որպես վստահելի և հուսալի գործընկեր: Այսօր աշխարհում Հայաստանի Հանրապետության անունը տալիս են հարգանքով ու հպարտությամբ, և այս ամենը այն պատճառով, որ մեր կողքին է Հայկական Սփյուռքը»:

Միջոցառման ավարտին նախարարը ոսկե մեդալներով պարգևատրեց Սպահանի հայոց թեմի ատենապետ Տ. Բաբկեն եպիսկոպոս Չարյանին և Թեմական խորհրդի ատենապետ Նոէլ Մինասյանին, պատվոգրեր շնորհեց Պատգամավորական ժողովի դիվանի և Կրոնական խորհրդի ատենապետ Աշոտ Դավթյանին և Արշալույս Խուդավերդյանին, իսկ Վ. Սարոյանի անվան մեդալներով՝ վաստակավոր ուսուցիչ Լևոն Մինասյանին և գրող-բանաստեղծ Ազատ Մադաթյանին: