Ջերմուկում տեղի կունենա գյուղական համայնքների երկրորդ համաժողովը

Հոկտեմբերի 5-6-ը Ջերմուկում տեղի կունենա գյուղական համայնքների երկրորդ համաժողովը, որի ընթացքում քննարկվելու են տեղական ինքնակառավարման ոլորտի արդի հիմնախնդիրները: Համաժողովի նպատակն է աջակցել գյուղական համայնքների կայուն զարգացմանը՝ ոլորտում գործող բոլոր դերակատարների երկխոսության, իրականացվող ծրագրերի և քաղաքականությունների վերաբերյալ տեղեկատվության փոխանակման միջոցով։ Այս մասին հայտնում է ՀՀ ՏԿՆ Հասարակայնության հետ կապերի ծառայությունից։

Համաժողովին մասնակցելու են պետական կառավարման մարմինների, համայնքների, տեղական ինքնակառավարման համակարգի հետ աշխատող տարբեր միջազգային և տեղական կազմակերպությունների ներկայացուցիչներ, փորձագետներ: Յուրաքանչյուր մարզ համաժողովին կմասնակցի մարզպետի գլխավորությամբ առանձին պատվիրակությամբ, որի կազմում ընդգրկված կլինեն տասը համայնքապետեր:

Համաժողովի ընթացքում կկազմակերպվեն բանախոսություններ և քննարկումներ՝ հետևյալ վեց թեմատիկ աշխատանքային խմբերում.

1. Տեղական ինքնակառավարման մարմինների կողմից իրականացվող ծախսային քաղաքականության ընդհանուր մեթոդաբանության ձևավորում

2. Տեղական եկամուտների վարչարարության խնդիրները

3. Տեղական տնտեսական զարգացումը և տեղական իշխանությունների դերը,

4. Տարածքային համաչափ զարգացում, առաջանցիկ մեխանիզմների մշակում, հրատապ ծրագրերի ամփոփում

5. Կոշտ կենցաղային թափոնների կառավարումը Հայաստանում

6. Տեղական ժողովրդավարություն, տեղական ինքնակառավարմանը բնակիչների մասնակցություն: