«Մենք ամեն ինչ անելու ենք, որպեսզի խաղաղության օրակարգն իր տրամաբանական ավարտին հասցնենք»․ Խաչատուր Սուքիասյան
Տեսանյութեր«Մենք ամեն ինչ անելու ենք, որպեսզի խաղաղության օրակարգն իր տրամաբանական ավարտին հասցնենք, որի համար ես ուզում եմ շնորհակալություն հայտնել համարձակության համար պետական, քաղաքական գործիչ Նիկոլ Փաշինյանին, որ երեկ իր ելույթում ՀՀ քաղաքացիներին ասաց այն ճշմարտությունը, որն ունեցել ենք». Այս մասին այսօր՝ ապրիլի 14-ին, ԱԺ-ում ասաց քպ-ական պատգամավոր Խաչատուր Սուքիասյանը։
«Օրինակ, մեր եղբայր վրացիները, մեր բարեկամ Իրանի Իսլամական Հանրապետությունը, մեր հարևան Ադրբեջանն ու Թուրքիան: Մենք պետք է ամեն ինչ անենք, որ այն առևտրաշրջանառությունը, որ ունենք եղբայր վրացական պետության հետ և բարեկամ Իրանի Իսլամական Հանրապետության հետ, ամեն օր, ամեն ժամ մեծացնենք, խոշորացնենք, ավելի նոր ծրագրեր իրականացնենք: Այն հարևանները, որոնց հետ չենք ունեցել առևտրաշրջանառություն, ոչ մի հարաբերություն, պետք է ամեն ինչ անենք, որ դա իրական դառնա»,- նշեց Սուքիասյանը՝ անդրադառնալով Հայաստանի հարևաններին:
Սուքիասյանի խոսքով՝ այն պետությունները, որոնք իրենց հարևանների հետ ունեն բարիդրացիական հարաբերություններ, առևտրաշրջանառության որոշակի մակարդակ, առք, վաճառք, դա ինչ-որ առումով զսպող գործիք է հանդիսանում:
«Երբ կոնֆլիկտներ են առաջանում, դրանք զսպող գործոն են դառնում, որովհետև հասկանում են, որ, եթե այդ երկրի հետ կոնֆլիկտն ավելի խորանա, հնարավոր է, որ իրենց տնտեսությունն ավելի մեծ վնասներ կրի: Դրա համար մենք պետք է ամեն ինչ անենք, որպեսզի կարողանանք մեր հարևանների հետ ունենանք այն հարաբերությունը, որով մենք ապագայում ապահովելու ենք ՀՀ հասարակության բարեկեցությունը»,- ասաց Սուքիասյանը:
ՈՒՂԻՂ ԵԹԵՐ
Ամենադիտված 
Փաշինյանի դուստրերի լուսանկարները՝ Չինաստանից
