ՀՀ պետական բյուջեի եկամուտներն աճել են

Այս տարվա հունվար-օգոստոս ամիսներին, նախորդ տարվա նույն ժամանակահատվածի համեմատ, պետական բյուջեի եկամուտներն աճել են 6.5%-ով կամ 35.7 մլրդ դրամով, որը հիմնականում ապահովվել է հարկային եկամուտների աճի հաշվին:

Պետական բյուջեի եկամուտների 94.2%-ը ձևավորվել է հարկային եկամուտների, պետական տուրքերի և պարտադիր սոցիալական ապահովության վճարների, 5.1%-ը՝ այլ եկամուտների, 0.7%-ը՝ պաշտոնական դրամաշնորհների հաշվին:

2012 թվականի հունվար-օգոստոս ամիսներին ՀՀ պետական բյուջե են մուտքագրվել 553.5 մլրդ դրամ հարկային եկամուտներ, պետական տուրքեր և պարտադիր սոցիալական ապահովության վճարներ, որոնք ապահովել են իննամսյա ծրագրի 88.2% կատարողական: 2011 թվականի նույն ժամանակահատվածի համեմատ նշված եկամուտներն աճել են 8.1% ով կամ 41.5 մլրդ դրամով:

2012 թվականի հունվար-օգոստոսի պետական բյուջեի հարկային եկամուտներն ու տուրքերը կազմել են 470 մլրդ դրամ, որի 48.3%-ն ապահովվել է ավելացված արժեքի հարկի հաշվին: Այն կազմել է շուրջ 227.2 մլրդ դրամ և 7.1%-ով կամ 15.1 մլրդ դրամով գերազանցել նախորդ տարվա նույն ցուցանիշը: ԱԱՀ-ի մուտքերից ավելի քան 141.8 մլրդ դրամը ստացվել է ՀՀ սահմանին հարկումից, 85.3 մլրդ դրամը՝ ներքին շրջանառությունից: Հարկ է նշել, որ ԱԱՀ-ի մուտքերի աճն ապահովվել է հիմնականում ներքին շրջանառության հաշվին, որի գծով մուտքերն աճել են 11.8%-ով, իսկ ներմուծումից ստացված եկամուտների գծով արձանագրվել է 4.4% աճ:

Պետական բյուջեի հարկային եկամուտների ու պետական տուրքերի 6.3%-ն ապահովվել է ակցիզային հարկի հաշվին՝ կազմելով 29.4 մլրդ դրամ: Մասնավորապես՝ հանրապետություն ներմուծվող ենթաակցիզային ապրանքների հարկումից ստացվել է 19.7 մլրդ դրամ, հանրապետությունում արտադրվող ենթաակցիզային ապրանքների հարկումից՝ 9.7 մլրդ դրամ:

Հաշվետու ժամանակահատվածում ՀՀ պետական բյուջեի հարկային եկամուտների 17.1% ը ձևավորվել է շահութահարկի հաշվին՝ կազմելով 80.4 մլրդ դրամ: Նախորդ տարվա նույն ժամանակահատվածի համեմատ շահութահարկի մուտքերն աճել են 15.2%-ով կամ 10.6 մլրդ դրամով:

Մաքսատուրքի գծով մուտքերը կազմել են շուրջ 26.5 մլրդ դրամ կամ հարկերի և տուրքերի 5.6%-ը և 8.3%-ով (2 մլրդ դրամով) գերազանցել 2011 թվականի համապատասխան ցուցանիշը:

2012 թվականի հունվար-օգոստոս ամիսներին պետական բյուջե են մուտքագրվել շուրջ 15.2 մլրդ դրամ պետական տուրքեր՝ կազմելով իննամսյա ծրագրի 97.2%-ը: Նախորդ տարվա նույն ժամանակահատվածի համեմատ նշված մուտքերն աճել են 9.4% ով կամ 1.3 մլրդ դրամով:

Հաշվետու ժամանակահատվածում գործունեության առանձին տեսակներից գանձվել են 10.7 մլրդ դրամ հաստատագրված վճարներ՝ ապահովելով հարկային եկամուտների ու պետական տուրքերի 2.3%-ը: Նշված մուտքերը նախորդ տարվա նույն ժամանակահատվածի համեմատ նվազել են 22.5%-ով (3.1 մլրդ դրամով):

2012 թվականի հունվար-օգոստոսին ՀՀ պետական բյուջե են մուտքագրվել 15.1 մլրդ դրամ բնօգտագործման և բնապահպանական վճարներ՝ կազմելով հարկերի և տուրքերի 3.2%-ը:

Հաշվետու ժամանակահատվածում ՀՀ պետական բյուջե են մուտքագրվել 6.9 մլրդ դրամի այլ հարկեր՝ կազմելով հարկերի և տուրքերի 1.5%-ը: Մասնավորապես՝ 3.5 մլրդ դրամ են կազմել արտոնագրային վճարները, 1.7 մլրդ դրամ՝ ճանապարհային վճարները, 328.6 մլն դրամ՝ կոնցեսիոն վճարը, 290.7 մլն դրամ՝ հարկային օրենսդրության խախտման համար «Հարկերի մասին ՀՀ օրենքով սահմանված տուգանքները, 281.9 մլն դրամ՝ հանրային ծառայությունների կարգավորման պարտադիր վճարները, 13 մլն դրամ՝ ռադիոհաճախականության օգտագործման թույլտվության տրամադրման (գործողության ժամկետի երկարաձգման) վճարները և 922.2 մլն դրամ՝ ՀՀ կառավարությանն առընթեր պետական եկամուտների կոմիտեի նյութական խրախուսման ֆոնդի եկամուտները:

Պարտադիր սոցիալական ապահովության վճարների գծով 2012 թվականի հունվար-օգոստոս ամիսների եկամուտները կազմել են շուրջ 83.5 մլրդ դրամ: 2011 թվականի նույն ժամանակահատվածի համեմատ դրանց աճը կազմել է 1.9% կամ 1.5 մլրդ դրամ:

2012 թվականի հունվար-օգոստոս ամիսների ընթացքում արտաքին աղբյուրներից ստացվել են 4.2 մլրդ դրամ պաշտոնական դրամաշնորհներ՝ գերազանցելով իննամսյա ծրագրով նախատեսված ցուցանիշը 47.5%-ը:

Ցածր կատարողական է արձանագրվել իրավաբանական անձանց կապիտալում կատարված ներդրումներից ստացվող շահաբաժինների գծով, որոնք անցած ութ ամիսներին կազմել են 182.2 մլն դրամ կամ ինն ամիսների համար ծրագրված ցուցանիշի 26.3%-ը: Նախորդ տարվա նույն ժամանակահատվածի համեմատ ևս նշված մուտքերը նվազել են՝ 64% ով կամ 323.3 մլն դրամով:
2011 թվականի նույն ժամանակահատվածի համեմատ այլ եկամուտներն աճել են 8.5% ով կամ շուրջ 2.4 մլրդ դրամով: