Կմշակվի տաքսու վարորդների արտաքին տեսքի, ծխելու և այլ հարցերի հետ կապված կանոնակարգ

Հայաստանի Հանրապետության տրանսպորտի և կապի նախարարությունում հոկտեմբերի 3-ին տեղի է ունեցել խորհրդակցություն՝ մարդատար տաքսի ավտոմեքենաներով ուղևորափոխադրումների գործունեության իրականացմանը ներկայացվող պահանջների, առկա խնդիրների և դրանց լուծմանն ուղղված միջոցառումների շուրջ։ Խորհրդակցությունը վարել է ՀՀ տրանսպորտի և կապի նախարարի տեղակալ Արտաշես Ավետիսյանը:

Նշված հարցերի քննարկմանը մասնակցել են ՏԿ նախարարության լիցենզավորման գործակալության պետ Աշոտ Սահակյանը, Ճանապարհային ոստիկանության պետի տեղակալ Արթուր Տոնոյանը, Սպառողների իրավունքների պաշտպանության ասոցիացիայի նախագահ Արմեն Պողոսյանը, մի շարք գերատեսչությունների, գործող տաքսի ծառայությունների ներկայացուցիչներ, անհատ ձեռնարկատերեր։

Ա. Ավետիսյանը նշել է, որ վերջին տարիներին ՀՀ տրանսպորտի և կապի նախարարության կողմից բազմաթիվ օրենսդրական նախաձեռնություններ են եղել տաքսի ծառայությունների և անհատ ձեռնարկատերերի լիցենզավորման գործընթացի վերաբերյալ, ինչը միտված էր այդ գործունեության կազմակերպման, իրականացվող աշխատանքների առավել պարզեցմանն ու հստակեցմանը: Բայց անհրաժեշտ է , որ կատարված քայլերը կարևորվեն նաև սպառողների իրավունքների տեսանկյունից:

Քննարկման ընթացքում մասնակիցների կողմից ներկայացվել են այն կոնկրետ աշխատանքները, որոնք կատարվել են հիշյալ խնդիրներին լուծում տալու ուղղությամբ. լիցենզավորման գործընթացում նվազեցվել է թղթաշրջանառությունը, հանվել է մարդատար տաքսի ավտոմեքենաների համար սահմանված 10 տարվա սահմանափակումը, հստակեցվել են լիզենզիա և լիցենզիայի ներդիրներ ստանալու համար ներկայացվող հայտերի մերժման հիմքերը… Կատարվել են նաև արձանագրված խախտումների վերաբերյալ ուսումնասիրություններ, ըստ որոնց վերջին 3 ամիսների ընթացքում, միայն տաքսիների միջոցով ուղևորափոխադրումների դեպքում, հայտնաբերվել և արձանագրվել է 1080 խախտում: Դրանցից 38-ը առանց սակաչափիչների, 160-ը՝ առանց ճանապարհային թերթիկի ուղևորափոխադրում իրականացնելու, իսկ 137-ը՝ լիցենզիայի պահանջների այլ խախտումների համար են։

Կարևորվել են դեղին համարանիշերի ստացման ընթացակարգի առավել դյուրացման, տաքսիներում տեղադրված հաշվիչների նկատմամբ պահանջների խստացման խնդիրները: Արդյունքում՝ ուղևորը պետք է հստակ իմանա, թե փոխադրավարձը որքան է 1 կմ-ի համար, որքան պետք է վճարի նստելավարձի, կամ մեքենայի սպասելու համար:

Ճանապարհային ոստիկանության պետի տեղակալ Արթուր Տոնոյանը՝ քննարկվող խնդրի վերաբերյալ, առաջարկել է էլ ավելի պարզեցնել ու հստակեցնել լիցենզավորման ընթացակարգերը, տաքսիների ու կանոնավոր ուղևորափոխադրումներ իրականացնող տրանսպորտային միջոցների համար հանել դեղին համարանիշերի պահանջը, փոխարենը՝ տաքսիների վրա հոլոգրաֆիկ որևէ նշան փակցնել։

Հանգամանորեն քննարկվել է հաշվիչների խնդիրը։ Չափագիտության ազգային ինստիտուտի տնօրեն Վահան Սահակյանն առաջարկել է միասնական վճարի չափ սահմանել բոլոր տաքսիների համար: «Նստելավարձը պետք է նույնը լինի, իսկ ուղևորավարձը պետք է սահմանվի՝ ելնելով տվյալ մեքենայի որակից։ Դրանից հետո արդեն թող սպառողն ինքը որոշի՝ թա՞նկ է, թե՞ էժան տվյալ մեքենայից օգտվելը»,-ասել է նա, ինչին համակարծիք են եղել նաև քննարկմանը ներկա տաքսի ծառայությունների ներկայացուցիչները։

Քննարկվող կարևորագույն հարցերից մեկն էլ վերաբերել է իրենց անձնական մեքենայով տաքսի ծառայություն մատուցել ցանկացող անհատներին հնարավորինս ընդառաջելու խնդրին: Արտահայտելով ՀՀ տրանսպորտի և կապի նախարարության դիրքորոշումը, նախարարի տեղակալ Ա. Ավետիսյանը նշել է. «Ուզում ենք դաշտն ազատել նրանց համար, ովքեր 1 մեքենայով ուզում են աշխատել՝ դրանով լուծելով իրենց սոցիալական խնդիրները»:

Խորհրդակցության ժամանակ քննարկվել են նաև վարորդների արտաքին տեսքի, ծխելու, ամենօրյա բուժզննում անցնելու, մեքենաների տեխնիկական վիճակի հետ կապված մի շարք հարցեր։ Սպառողների իրավունքների պաշտպանության ասոցիացիայի նախագահ Արմեն Պողոսյանն առաջարկել է այդ խնդիրներին լուծում տալու համար մշակել վարորդների վարքականոններ։ «Մենք կմշակենք նման մի կանոնակարգ և առաջիկայում կներկայացնենք քննարկման»,- այս առաջարկին ի պատասխան՝ ասել է Ա. Ավետիսյանը:

Ամփոփելով քննարկման արդյունքները՝ նախարարի տեղակալն ընդգծել է, որ խորհրդակցության ընթացքում բարձրացված խնդիրները, առաջարկություններն ու մտահոգությունները, անպայման հաշվի կառնվեն։