Ինչպես է Պուտինը նշում 60-ամյակը

Այսօր Ռուսաստանի Դաշնության նախագահ Վլադիմիր Պուտինը նշում է իր 60-ամյակը, ինչն արդեն նրա երրորդ հոբելյանն է այս պաշտոնում. փոխանցում է Итар ТАСС-ը։

Չնայած այն բանին, որ Պուտինի հոբելյանական տարեդարձն է, այնուամենայնիվ, ինչպես և նախորդ տարիների ժամանակ, նա կնշի այն գործնական հանդիպումներին զուգահեռ։ Այսօր երեկոյան ՌԴ նախագահը, վերադառնալով Ուլյանովսկից, կմեկնի իր հարազատ Սանտկ Պետերբուրգ քաղաքը, որտեղ էլ համեստ միջավայրում կնշի ծննդյան տարեդարձը։

ՌԴ նախագահի տարեդարձի կապակցությամբ երկրում լայնածավալ միջոցառումներ կիրականացվեն։ Մասնավորապես իշխող «Միացյալ Ռուսաստան» կուսակցության երիտասարդական թևն այսօր հատուկ ակցիա կկազմակերպի «Մենք Ռուսաստանն ենք, իսկ Ռուսաստանը՝ Պուտինը» կարգախոսով։

Ծննդյան միջոցառումներում իրենց մասնակցությունը կունենան նաև ընդդիմության ներկայացուցիչները, որոնք Կրեմլի մոտ հատուկ ֆլեշմոբ են կազմակերպել, որի ընթացքում նրանք կկրեն ակնոցներ, հողաթափեր և հողագործական գործիքներ՝ այն ամենը, ինչն անհրաժեշտ է թոշակի անցնելու համար. այդպիսով կոչ կանեն Պուտինին անցնել թոշակի։

Նախագահի խոսնակ Դմիտրի Պեսկովը նշել է, որ Պուտինը «մեծ խնջույքների սիրահար չէ և պատրաստվում է տանը՝ ընկերների ու հարազատների շրջապատում նշել իր 60-ամյակը»։

Հարցին, թե արդյոք այս տարի ևս նրան շնորհավորելու կգա Իտալիայի նախկին վարչապետ Սիլվիո Բեռլուսկոնին, խոսնակը պատասխանել է, որ ծանոթ չէ հյուրերի ցուցակին:

Իսկ ահա իտալական լրատվամիջոցների տեղեկությունների համաձայն` այդ ցուցակում Բեռլուսկոնիի անունը միանշանակ չի բացակայում։