Ժան Ալմուխյանի մեծարման երեկոն

ՀՀ սփյուռքի նախարարության «Իմ Հայաստան» համահայկական փառատոնի շրջանակներում կայացավ արգենտինահայ կոմպոզիտոր, «Արաքս» երգչախմբի հիմնադիր, խմբավար Ժան Ալմուխյանի 80-ամյակին և 55-ամյա երաժշտական գործունեության մեծարմանը նվիրված երեկոն:

Ժան Ալմուխյանը ծնվել է 1932թ. Հունաստանում, 1947-ից ընտանիքով հաստատվել Արգենտինայում: Ուսանել է Արգենտինայի ականավոր վարպետների մոտ:

1957-ին մի խումբ արվեստասեր ընկերների հետ հիմնել են «Հայ երաժշտության բարեկամներ» ընկերակցությունը և «Արաքս» երգչախումբը, որի գեղարվեստական ղեկավարն է մինչ օրս:

Արամ Խաչատրյան համերգասրահում կայացած համերգի ժամանակ Ժան Ալմուխյանի ստեղծագործությունները կատարեցին մենակատարներ Սոֆիա Բաղդասարյանը, Սարգիս Աղամալյանը, դաշնակահարներ Արամ Թուրաբյանը և Սեդրակ Երկանյանը: Մի շարք ստեղծագործություններ կատարեց Հայաստանի պետական ակադեմիական երգչախումբը՝ Հովհաննես Չեքիջյանի դիրիժորությամբ:

Համերգի ավարտին Ժան Ալմուխյանի վաստակը գնահատեց ՀՀ սփյուռքի նախարար Հրանուշ Հակոբյանը՝ նշելով. «Ջերմորեն շնորհավորում եմ Ձեր հոբելյանը՝ 60 գումարած 20 տարին: Դուք 60 տարի ստեղծագործել եք, հաստատվել Արգենտինայում, բայց վերջին 20 տարին նոր որակ է հաղորդել Ձեր ստեղծագործությանը՝ դրանք հայրենիքի ու մայրենիի մասին են: Ձեր հոգին լցված է ազատ ու անկախ հայրենիքի կանչով: Դուք կարողացաք պահել հայկական երգչախումբ, որը մի փոքրիկ հայկական կղզի է հեռավոր Արգենտինայում: Շնորհակալություն ենք հայտնում, որ հայապահպանության հարցում կարողանում եք այդքան մեծ ավանդ ունենալ»:

ՀՀ սփյուռքի նախարար Հ. Հակոբյանը գերատեսչական ոսկե մեդալով պարգևատրեց Ժան Ալմուխյանին: «Ես շատ եմ եղել Հայաստանում, ունեցել մենահամերգ, արժանացել ջերմ ընդունելության: Սակայն այսօրվա հանդիսությունը և այս բարձր շքանշանը պիտի կրեմ մեծ պատվով և ոգևորությամբ: Սա մեծ խորհուրդ ունի ինձ համար. 55 տարի առաջ մենք հիմնեցինք «Արաքս» երգչախումբը, որը նախ բանակ է, ապա նոր գեղարվեստական խումբ»,- նշեց Ժան Ալմուխյանը: