Երևանում կբացվի սիրիական ծրագրով դպրոց

ՀՀ սփյուռքի նախարարությունը հաղորդագրություն է տարածել հետևյալ բովանդակությամբ.

«Հոկտեմբերի 9-ին, ժամը 9.30-ին, Երևանի Նար Դոսի անվան հ. 14 հիմնական դպրոցում տեղի կունենա սիրիական կրթական ծրագրով (արաբերենով) «Կիլիկեան» դպրոցի բացման հանդիսությունը: Դպրոցի ստեղծումը նախաձեռնել է «Կիլիկիա» բարեսիրական կազմակերպությունը և պայմանավորված է Հայաստանում հաստատված ընտանիքների մի մասի՝ Սիրիայում քաղաքական իրավիճակը կայունանալուց հետո երկիր վերադառնալու ցանկությամբ, կրթական գործընթացը չընդհատելու, վերադարձի ժամանակ դժվարություններ չառաջանալու խնդրով:

ՀՀ սփյուռքի նախարարության աշխատակիցների ուժերով ստեղծվեց աշխատանքային-կրթական հանձնախումբ, որի մեջ մտան սիրիահայ կազմակերպությունների ներկայացուցիչներ, կրթական գործի պատասխանատուներ, մանկավարժներ: համակարգեց սիրիական կրթական ծրագրով դպրոցի ստեղծման գործնընթացը՝ ՀՀ կրթության և գիտության նախարարության, Երևանի քաղաքապետարանի հանրակրթության վարչության աջակցությամբ, նախաձեռնող կազմակերպության հետ համատեղ: Կայացան բազմաթիվ աշխատանքային խորհրդակցություններ ՀՀ սփյուռքի, կրթության և գիտության նախարարների մոտ: Օգոստոս-սեպտեմբերին աշխատանքներ տարվեցին Հայաստանում, մասնավորապես Երևանում գտնվող սիրիահայ երեխաների, ուսուցիչների հաշվառման, դասարանների կոմպլեկտավորման, Սիրիայից 1-9-րդ դասարաններում դասավանդվող առարկաներին համապատասխան դասագրքերից 1-ական օրինակների ձեռքբերման և բազմացման, դպրոցի ընտրության, դասարանները դպրոցական կահույքով և պարագաներով ապահովելու, ուսումնական գործընթացին առնչվող այլ խնդիրների լուծման ուղղությամբ: Ընտրվեց հ. 14 հիմնական դպրոցի շենքը` սիրիական դպրոցի 1-9-րդ դասարանների ուսման գործընթացի կազմակերպման համար և, ի սկզբանե որոշվեց դպրոցի դասերն սկսել սիրիական դպրոցների կրթաշրջանի բացման օրերին` ոչ ուշ սեպտեմբերի 18-ը, սակայն դասագրքերի պատճառով հետաձգվեց:

Սիրով հրավիրում ենք Երևանի Նար Դոսի անվան հ. 14 հիմնական դպրոց, ուր հոկտեմբերի 9-ին, ժամը 9.30-ին տեղի կունենա դպրոցի բացման հանդիսավոր արարողությունը:

ՀՀ սփյուռքի նախարարություն»։