Pussy Riot-ի անդամին ազատ են արձակել դատական նիստերի սրահից

Pussy Riot-ի անդամ Եկատերինա Սամուցեվիչին ազատ են արձակել դատավարությունների սրահից, հայտնում է Lenta.ru-ն։ Մոսկվայի քաղաքային դատարանը մեղմացրել է նրա պատիժը՝ իրական ազատազրկումը փոխարինելով երկու տարվա պայմանական ազատազրկմամբ։ Բացի այդ, նրա համար երկու տարի ժամկետով փորձաշրջան է նշանակվել։ 

Խամովնիկի շրջանի դատարանի վճիռը Նադեժդա Տոլոկոննիկովայի և Մարիա Ալեխինայի նկատմամբ մնացել է նույնը։ Նրանք դատապարտված են երկու տարվա գաղութային ազատազրկման։

Դատական նիստի ընթացքում դատապարտյալները կրկնել են, որ Քրիստոս Փրկչի եկեղեցում իրենց ելույթով նրանք չեն ցանկացել վիրավորել հավատացյալների զգացմունքները. նրանց գործողությունները քաղաքական բնույթ են կրել։ «Մենք պայքարի մեջ գտնվող անհավատներ չենք։ Ես ուզում եմ, որ ինձ հիմա լսեն,-հայտարարել է Մարիա Ալխինան։-Մենք դեմ ենք խաչեր ջարդելուն, սրբանկարներ գողանալուն, սրբանկարները թանաքով փչացնելուն։ Մենք դա զզվելի ենք համարում։ Դա մեզ համար անընդունելի է»։

Դատապարտյալների փաստաբանները դատական նիստի ընթացքում խնդրել են անցկացնել իրենց պաշտպանյալների գործողությունների կրկնակի փորձաքննություն՝ արդյոք նրանք հրահրում են կրոնական տարաձայնություններ, թե ոչ։ Դատարանը մերժել է այդ խնդրանքը։