Պետք է հարմարվենք կլիմայի պայմաններին

Երեկ` հոկտեմբերի 10-ին ՀՀ գյուղատնտեսության նախարար Սերգո Կարապետյանն ընդունել է Երևանում գտնվող Համաշխարհային բանկի Հարավային Կովկասի երկրների գյուղատնտեսության ոլորտում կլիմայի փոփոխությանը հարմարվելու և այն մեղմելու ռազմավարությունների մշակման խմբի պատվիրակությանը` Նիկոլաս Ահուիսուսի գլխավորությամբ: Պատվիրակությունը Հայաստան է ժամանել մասնակցելու Համաշխարհային բանկի, ՀՀ գյուղատնտեսության և բնության պահպանության նախարարությունների նախաձեռնությամբ կազմակերպվող համաժողովին` նվիրված Հայաստանի գյուղատնտեսության ոլորտում կլիմայի փոփոխությանը հարմարվելու և այն մեղմելու ռազմավարական ծրագրերի մշակմանը: Պատվիրակության կազմում էին միջազգային փորձագետ Ջեյմս Նեմանը և Համաշխարհային բանկի հայաստանյան գրասենյակի պատասխանատու Արուսյակ Ալավերդյանը:

Ողջունելով հյուրերին, նախարարը կարևորել է կլիմայի փոփոխությունների հետևանքով սպասվող իրավիճակներում Համաշխարհային բանկի կողմից Հայաստանին ցուցաբերվող ուշադրությունը և նշել, որ անհրաժեշտ է ըստ ամենայնի օժանդակել ուսումնասիրություններին հաջորդող քայլերի իրականացմանը: Ի պատասխան` պարոն Նիկոլաս Ահուիսուսը շնորհակալություն է հայտնել ջերմ ընդունելության համար և ներկայացրել ընթացիկ տարվա գարնանը կայացած առաջին նման հանդիպումից հետո իրենց կողմից Հայաստանում իրականացված այն ուսումնասիրությունների արդյունքները, որոնք քննարկվելու են այսօրվա աշխատաժողովի ընթացքում:

Իսկ այսօր Երևանի «Կոնգրես» հյուրանոցում աշխատանքն է սկսել Ազգային իրազեկման և փոխհամաձայնեցման համաժողովը: Առավոտյան նիստում ողջույնի խոսքով հանդես է եկել ՀՀ գյուղատնտեսության նախարար Սերգո Կարապետյանը: Մաղթելով մասնակիցներին արդյունավետ աշխատանք` նախարարը մասնավորապես նշել է. «Կլիմայի փոփոխությունների ազդեցությունների հետևանքների թվարկումը կարելի է շարունակել, սակայն ակնհայտ է մի բան, որ դրանք ընդհանուր են մեր տարածաշրջանի երկրների համար, և միայն համատեղ ջանքերով հնարավոր կլինի դիմակայել այդ մարտահրավերներին»: