Ֆրանսիացի գործարարները գոհունակություն են հայտնել ՏՄՊՊՀ նախագահին

Հայաստանում Ֆրանսիական դեսպանատան առաջարկով ՀՀ տնտեսական մրցակցության պաշտպանության պետական Հանձնաժողովի նախագահ Ա. Շաբոյանը ընդունել է դեսպանատան բարձրաստիճան պաշտոնյաների պատվիրակությանը: Պատվիրակությունը ղեկավարում էր Հարավային Կովկասի և Թուրքմենստանի տնտեսական ծառայության ղեկավար Դանիել Պատատը:

Քաջատեղյակ լինելով Հանձնաժողովի գործունեությանը, ֆրանսիացիները ողջունել են ՏՄՊՊՀ գործելաոճը և նշել, որ ակնհայտ է մրցակցային խնդիրների լուծման ուղղությամբ տարվող աշխատանքների արդյունավետությունը: Հանդիպման ընթացքում անդրադարձ է եղել նաև Մրցունակության համաշխարհային զեկույցի հրապարակած տարեկան ցուցանիշներին, ըստ որի՝ Հայաստանը մրցունակության առումով ակնհայտ առաջընթաց է արձանագրել: Համաձայն զեկույցի` գերիշխող դիրքերի ազդեցությունը մրցակցության վրա ցուցանիշով Հայաստանը բարելավել է իր դիրքերը 43 կետով: Հակամենաշնորհային քաղաքականության ուժեղության և հակամենաշնորհային մարմնի գործունեության արդյունավետության ցուցանիշով Հայաստանն առաջ է գնացել 23 կետով, իսկ ներքին շուկայում մրցակցության ինտենսիվության ցուցանիշով մեր երկիրը առաջընթաց է արձանագրել 9 կետով: Ընդ որում տարածաշրջանի մյուս երկրները, նշված ցուցանիշների առումով հիմնականում հետընթաց են արձանագրել: Պատվիարկության անդամներին հետաքրքրում էր նաև հատկապես պետական գնումների ոլորտում Հանձնաժողովի կատարած հրապարակային ուսումնասիրությունները:

Հանդիպման ընթացքում պատվիրակության անդամները հետաքրքրվել են Հանձնաժողովի առաջիկա ծրագրերով և նշել, որ պատրաստ են աջակցել՝ տնտեսական ոլորտում տարբեր ծրագրերի իրականացման հարցում:

Ֆրանսիացի պաշտոնյաները ընգծել են, որ օրերս Հայաստանում ֆրանսիական ընկերությունների ղեկավարների հետ հանդիպման ընթացքում վերջինները հավաստիացրել են, որ Հանձնաժողովի կողմից մրցակցային միջավայրի բարելավմանն ուղղված աշխատանքները ակնհայտ են և դրական են անդրադառնում իրենց գործունեության վրա: