Աղավնոյի, Բերձորի հանձնումը օրինաչափություն է, քանի որ ՀՀ-ում իշխանության եկան անհայրենիքներ․ Հայրիկյան

Աղավնոյի, Բերձորի, Սուսի ճակատագիրը շարունակում է մտահոգել հասարակական-քաղաքական լայն շրջանակներին։ Արցախյան այդ բնակավայրերի մոտալուտ հանձնումը Ադրբեջանին շատերը համարում են ցավալի կորուստ, ավելի իրատեսները՝ օրինաչափություն։ 

«Աղավնոյի, Բերձորի և մյուս տարածքների հանձնումը օրինաչափություն է, քանի որ Հայաստանում 4 տարի առաջ իշխանության եկան անկապ, անհայրենիք մարդիկ, որոնք ավելի վտանգավոր են, քան նախկինում ԱԱԾ-ի գործակալները»,-ԼՈՒՐԵՐ.com-ի հետ զրույցում ընդգծեց ԱԻՄ առաջնորդ Պարույր Հայրիկյանը, ով, ի դեպ, 30 տարի առաջ եղել է այդ տարածաշրջանում բնակավայրեր հիմնադրելու նախաձեռնողներից մեկը, այնուհետ՝ նշանակվել այնտեղի պարետ։

Փորձառու գործիչը հիշեցրեց, որ այս վտանգավոր ու դավադիր սցենարը կանխելու համար ինքը տարիներ առաջ հանդես է եկել Հայաստանի ու Արցախի անվտանգության վերաբերյալ հատուկ առաջարկությամբ։

Ինչ վերաբերում է Աղավնոյում հանրային ինքնապաշտպանություն իրականացնող մարդկանց գործողություններին, դրանց արդյունավետությանը կամ վտանգավորությանը, Պարույր Հայրիկյանն ասաց հետևյալը․

«Մարդկանց այդ քայլը բնական է, այն ինչ-որ առումով ինքնապաշտպանական, ինքնամխիթարական փորձ է։ Բայց հուսահատ այդ քայլերը չեն կարող որևէ արդյունք տալ։ Որևէ գործողության արդյունավետություն կարող են ապահովել միայն ազգային կառույցներն ու լիազոր մարմինները»։

Զրուցեց՝ Արա Ալոյանը