Քննարկվել է ոռոգման համակարգում իրականացող ծրագրերի ընթացքը

ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Համաշխարհային բանկի (ՀԲ) պատվիրակությանը՝ հայաստանյան գրասենյակի տնօրեն Ժան Միշել Հափիի գլխավորությամբ: Հանդիպմանը ներկա էին նաև ՏԿՆ Ջրային տնտեսության պետական կոմիտեի նախագահ Անդրանիկ Անդրեասյանը և «Ջրային տնտեսության զարգացման և բարեփոխումների ծրագրերի իրականացման գրասենյակ» ՊՀ տնօրեն Ադիբեկ Ղազարյանը:

Կողմերը քննարկել են ոռոգման համակարգում իրականացվող և նախանշվող ծրագրերին առնչվող հարցեր: Երկուստեք գոհունակություն է հայտնվել ՀԲ աջակցությամբ իրականացվող «Ոռոգման համակարգերի վերականգնման հրատապ ծրագրի» ընթացքից:

Փոխվարչապետը ողջունելի է համարել, որ Համաշխարհային բանկը շարունակում է ուշադրության կենտրոնում պահել Հայաստանում ջրամատակարարման համակարգի բարելավմանն ուղղված ծրագրերը և անգամ փորձում է այդ ծրագրերում այլ գործընկերների ներգրավել:

«Մեր օրակարգում շարունակում է մնալ առավելագույնս արդյունավետ ոռոգման համակարգ ունենալու հարցը, որի միջոցով հնարավոր կլինի ոռոգման ջրով ապահովել գյուղացիական բոլոր տնտեսությունների պահանջարկը»,-նշել է փոխվարչապետը՝ ավելացնելով, որ պետք է ամեն ինչ արվի ջրի կորուստների, ջրի ինքնարժեքի նվազման, ՋՕԸ-երի կարողությունների հզորացման և աշխատանքի արդյունավետության բարձրացման ուղղությամբ:

Հյուրերը փոխվարչապետի հետ քննարկել են նոր ծրագրերի իրականացման ուղղությունները՝ հաշվի առնելով նաև կառավարության գերակայությունները: Անդրադարձ է եղել նաև ջրավազանային համակարգի կառավարման պլանների, ջրային ռեսուրսների ռազմավարության մշակման ուղղությամբ հետագա համատեղ ծրագրերին: