Տեղի կունենա հայ-ռուսական միջտարածաշրջանային երկրորդ համաժողովը

Վաղը` հոկտեմբերի 13-ին, Երևանում տեղի կունենա հայ-ռուսական միջտարածաշրջանային երկրորդ համաժողովը, որն այս տարի կանցկացվի «Հայաստան և Ռուսաստան. միջտարածաշրջանային երկխոսություն-2012» խորագրով: Լիագումար նիստում հիմնական ելույթներով հանդես կգան ՀՀ վարչապետ Տիգրան Սարգսյանը և ՌԴ տրանսպորտի նախարար, ՀՀ և ՌԴ միջև տնտեսական համագործակցության միջկառավարական հանձնաժողովի նախագահ Մաքսիմ Սոկոլովը:

Համաժողովին մասնակցելու են երկու երկրների կենտրոնական և տարածաշրջանային իշխանությունների, ոչ կառավարական կազմակերպությունների, գործարար շրջանակների ներկայացուցիչներ:

Ռուսաստանի 13 սուբյեկտների, ինչպես նաև Մոսկվայի և Սանկտ Պետերբուրգի պատվիրակությունները, բացի համաժողովի բուն աշխատանքներին մասնակցելուց, մարզերում հանդիպումներ են ունեցել նաև հայաստանցի գործընկերների հետ, տեղերում քննարկել փոխգործակցության հեռանկարները: Հայաստանի բոլոր մարզերից ևս պատվիրակություններ են մասնակցելու համաժողովին:

Համաժողովի շրջանակում կստորագրվեն մի շարք փաստաթղթեր, այդ թվում` համագործակցության վերաբերյալ համաձայնագրեր ՀՀ Վայոց ձորի և ՌԴ Արխանգելսկի մարզերի, ՀՀ Լոռիի մարզի և «Հարավկովկասյան երկաթուղի» ՓԲ ընկերության միջև:

Լիագումար նիստի ավարտից հետո կազմակերպվելիք կլոր սեղանների ընթացքում քննարկումներ կծավալվեն Հայաստանի և Ռուսաստանի միջև առևտրատնտեսական կապերի զարգացման գործում միջտարածաշրջանային համագործակցության դերի, եվրասիական տարածքում ինտեգրացիոն գործընթացներին մասնակցության, տրանսպորտի և էներգետիկայի, հումանիտար ոլորտներում համագործակցության հարցերի շուրջ:

Համաժողովի աշխատանքների ավարտին կընդունվի ամփոփիչ հայտարարություն:

Հիշեցնենք, որ «Հայ-ռուսական դաշնակցային հարաբերություններում միջտարածաշրջանային համագործակցության նոր նվաճումներին ընդառաջ» խորագրով հայ-ռուսական միջտարածաշրջանային առաջին համաժողովը տեղի էր ունեցել 2011թ. ապրիլի 19-ին Երևանում:

Առաջին համաժողովի արդյունքների ամփոփումից հետո երկու երկրների միջև միջտարածաշրջանային կապերի ակտիվացման նպատակով ՀՀ և ՌԴ միջև տնտեսական համագործակցության միջկառավարական հանձնաժողովի շրջանակում ձևավորվել է միջտարածաշրջանային համագործակցության հարցերը համակարգող աշխատանքային խումբ: