Համագործակցության պայմանագիր է նախապատրաստվում ԵՊՀ եւ Վենետիկի համալսարանի միջեւ

Հոկտեմբերի 12-ին ՀՀ Սփյուռքի նախարար Հրանուշ Հակոբյանը հանդիպում ունեցավ բանասիրական գիտությունների դոկտոր, Վենետիկի համալսարանի հայագիտության ամբիոնի դասախոս Սոնա Հարությունյանի հետ: Կողմերը բարձր գնահատեցին ամբիոնի 3 տասնյակից ավելի տարիների գործունեությունը մեծանուն հայագետ Հ.Լեւոն Զեքիյանի ղեկավարության օրոք եւ անդրադարձան ներկա խնդիրերին: Զրույցի ընթացքում անդրադարձ կատարվեց ս.թ. հունիս ամսին Իտալիայում ՀՀ դեսպան Ռ.Կարապետյանի հանդիպմանը Վենետիկի համալսարանի ռեկտորի հետ: Ս.Հարությունյանը ուրախությամբ նշեց, որ դեսպանի այցից հետո միջհամալսարանական համագործակցության ընդարձակ պայմանագիր է նախապատրաստվում ԵՊՀ եւ Վենետիկի համալսարանի միջեւ, եւ ոլորտները չեն սահմանափակվելու լեզու եւ գրականություն առարկաներով: 2013 թվականին նախատեսված է նաեւ երկու համալսարանների ռեկտորների հանդիպումը Երեւանում: Զրույցի ընթացքում պարզվեց, որ համաձայն Իտալիայի գիտության եւ կրթության նախարարության նոր օրենքի, համալսարաններն անցնում են մասնակի ինքնաֆինանսավորման: Սա ենթադրում է արտաքին կառույցների եւ համալսարանի միջեւ համագործակցություն: Վենետիկի համալսարանը, որտեղ դասավանդվում են 40 լեզուներ, արդեն համագործակցում է դեսպանությունների միջոցով մի շարք պետությունների հետ, որոնք իրենց դրամական օժանդակությունն են բերում տվյալ համալսարանում դասավանդվող իրենց լեզվի եւ մշակույթի ամբիոններին: Ուրախությամբ նշենք, որ անցյալ տարի հայագիտության ամբիոնին իր նպաստն է բերել նաեւ ՀՀ Սփյուռքի նախարարությունը:

Այս նոր զարգացումների լույսի ներքո պետական միջամտության կարիք կա ի նպաստ մեր լեզվի եւ մեր մշակույթի տարածմանը մի քաղաքում, որտեղ հայկական տարրը գոյություն ունի 6-7րդ դարերից, որտեղ 1235 թ.ին ծնվել է Եվրոպայի առաջին հայ տունը, որտեղ տպվել է հայ առաջին տպագիր գիրքը` Ուրբաթագիրքը, եւ ի վերջո որտեղ Մխիթար Սեբաստացին հաստատել է հայ մշակույթի սյուն իր Միաբանությունը Սբ. Ղազար կղզում: