Հայ-ռուսական միջտարածաշրջանային երկրորդ համաժողովը՝ այսօր

Երեւանում հոկտեմբերի 13-ին տեղի կունենա հայ-ռուսական միջտարածաշրջանային երկրորդ համաժողովը, որն այս տարի կանցկացվի «Հայաստան եւ Ռուսաստան. միջտարածաշրջանային երկխոսություն-2012» խորագրով: Լիագումար նիստում հիմնական ելույթներով հանդես կգան ՀՀ վարչապետ Տիգրան Սարգսյանը եւ ՌԴ տրանսպորտի նախարար, ՀՀ եւ ՌԴ միջեւ տնտեսական համագործակցության միջկառավարական հանձնաժողովի նախագահ Մաքսիմ Սոկոլովը:

Համաժողովին մասնակցելու են երկու երկրների կենտրոնական եւ տարածաշրջանային իշխանությունների, ոչ կառավարական կազմակերպությունների, գործարար շրջանակների ներկայացուցիչներ:

Ռուսաստանի 13 սուբյեկտների, ինչպես նաեւ Մոսկվայի եւ Սանկտ Պետերբուրգի պատվիրակությունները, բացի համաժողովի բուն աշխատանքներին մասնակցելուց, մարզերում հանդիպումներ են ունեցել նաեւ հայաստանցի գործընկերների հետ, տեղերում քննարկել փոխգործակցության հեռանկարները: Հայաստանի բոլոր մարզերից եւս պատվիրակություններ են մասնակցելու համաժողովին:

Համաժողովի շրջանակում կստորագրվեն մի շարք փաստաթղթեր, այդ թվում՝ համագործակցության վերաբերյալ համաձայնագրեր ՀՀ Վայոց ձորի եւ ՌԴ Արխանգելսկի մարզերի, ՀՀ Լոռիի մարզի եւ «Հարավկովկասյան երկաթուղի» ՓԲ ընկերության միջեւ:

Լիագումար նիստի ավարտից հետո կազմակերպվելիք կլոր սեղանների ընթացքում քննարկումներ կծավալվեն Հայաստանի եւ Ռուսաստանի միջեւ առեւտրատնտեսական կապերի զարգացման գործում միջտարածաշրջանային համագործակցության դերի, եվրասիական տարածքում ինտեգրացիոն գործընթացներին մասնակցության, տրանսպորտի եւ էներգետիկայի, հումանիտար ոլորտներում համագործակցության հարցերի շուրջ:

Համաժողովի աշխատանքների ավարտին կընդունվի ամփոփիչ հայտարարություն:

Հիշեցնենք, որ «Հայ-ռուսական դաշնակցային հարաբերություններում միջտարածաշրջանային համագործակցության նոր նվաճումներին ընդառաջ» խորագրով հայ-ռուսական միջտարածաշրջանային առաջին համաժողովը տեղի էր ունեցել 2011թ. ապրիլի 19-ին Երեւանում: Առաջին համաժողովի արդյունքների ամփոփումից հետո երկու երկրների միջեւ միջտարածաշրջանային կապերի ակտիվացման նպատակով ՀՀ եւ ՌԴ միջեւ տնտեսական համագործակցության միջկառավարական հանձնաժողովի շրջանակում ձեւավորվել է միջտարածաշրջանային համագործակցության հարցերը համակարգող աշխատանքային խումբ: