Բնապահպանության նախարարը կկասեցնի՞ ՀԷԿ-ի կառուցումը

Տավուշի մարզի Գետահովիտ համայնքի մի խումբ բնակիչներ հոկտեմբերի 3-ին դիմել էին Մարդու իրավունքների պաշտպանին Գետահովիտ համայնքի Աղստև գետի Պաղջուր վտակի վրա կառուցվող ՀԷԿ-ի կապակցությամբ, որն իրականացվում է առանց համապատասխան հասարակական լսումների և ՀՀ օրենսդրության մի շարք խախտումներով:

Պաշտպանը բարձրացված խնդրի կապակցությամբ դիմել է Բնապահպանության նախարարին՝ խնդրելով հնարավորինս սեղմ ժամկետներում համապատասխան կառույցներին հանձնարարել ուսումնասիրել խնդիրը, ներկայացնել տեղեկություններ իրավական հիմքերի չպահպանման վերաբերյալ:

Ըստ համայնքի բնակիչների՝ ՀԷԿ-ի կառուցման օրինականության հետ կապված մասնավորապես խախտվել են Օրհուսի կոնվենցիայի դրույթները, «Շրջակա միջավայրի վրա ազդեցության փորձաքննության մասին», «Բնության հատուկ պահպանվող տարածքների մասին», «Բուսական աշխարհի մասին», «Կենդանական աշխարհի մասին» օրենքներում ամրագրված դրույթները:

Հավելենք նաև, որ բնակիչները դժգոհում էին, որ հասարակական լսումները կատարվել են Տավուշի մարզի Ենոքավան համայնքում, այն դեպքում, երբ կառուցվող «Խաչաղբյուր»-2 ՓՀԷԿ-ի ազդեցությունն ամբողջությամբ տարածվում է Գետահովիտ համայնքի վրա: