Քաշաթաղի համայնքապետերը կշարունակե՞ն մնալ իրենց պաշտոններում՝ շրջանի՝ Ադրբեջանի հսկողության տակ անցնելուց հետո

Ինչպես հայտնի է, 2020 թ․ նոյեմբերի 9/10-ի եռակողմ հայտարարության համաձայն, Ադրբեջանի հսկողության տակ պիտի անցներ Քաշաթաղի շրջանի 52 համայնք, ինչը 2022 թ․ սեպտեմբերի 1-ի դրությամբ, Բերձոր շրջկենտրոնի, Աղավնո և Սուս գյուղերի հանձնումից հետո, այլևս ցավալի իրականություն է։

Բռնի տեղահանված քաշաթաղցիների խնդիրներով, որպես կանոն, զբաղվում է Արցախի կառավարությունը,սակայն հետաքրքիր է, թե ի՞նչ է սպասում տվյալ շրջվարչակազմի ղեկավարին ու մյուս համայնքների ղեկավարներին․ ի՞նչ կարգավիճակում ենք նրանք և ի՞նչ իրավասություններ ունեն այս պահին։

«Քաշաթաղի շրջանի բոլոր 52 համայնքների ղեկավարները, այդ թվում՝ շրջվարչակազմի ղեկավարը շարունակում են պաշտոնավարել՝ համաձայն Արցախի Ընտրական օրենսգրքի։ Մենք ընտրվել ենք 2019 թվականին՝ 5 տարի ժամկետով և մեր պաշտոնավարման ժամկետն ավարտվում է 2024 թվականին»,- ԼՈՒՐԵՐ․com-ի հետ զրույցում նշեց Բերձորի քաղաքապետ Նարեկ Ալեքսանյանը։

Նա նշեց, որ իրենց հիմնական առաքելությունը բռնի տեղահանված քաշաթաղցիների խնդիրներով զբաղվելն է․

«Բնականաբար, շարունակում ենք ուսումնասիրել և լուծում տալ բռնի տեղահանված մեր հայրենակիցների խնդիրներին, բնակարանային, սոցիալական, այլ հրատապ հարցերին»։

Նրա խոսքով, իրենց աշխատավայրը այս պահին Երևանն է, որտեղ գործում է Քաշաթաղի ներկայացուցչությունը։ Հարցին, թե ինչո՞վ է պայմանավորված, որ գրասենյակը Հայաստանում է, այլ ոչ թե՝ Արցախում, Բերձորի քաղաքապետը նշեց․

«Քանի որ քաշաթաղցիների գերակշիռ մասը՝ 95-97 տոկոսը տեղափոխվել և բնակություն է հաստատել Հայաստանում, Երևանում ու մարզերում, ավելի տրամաբանական է, որ մեր աշխատանքներն առավել արդյունավետ կազմակերպելու տեսակետից նախընտրելի է Երևանը»։

Ալեքսանյանը հավելեց նաև, որ առաջիկայում մտադրություն կա՝ համանման ներկայացուցչություն բացել նաև Արցախում։
 

Արա Ալոյան