Ռուսաստանը վիզային սահմանափակումներից հետո ԵՄ քաղաքացիներին փակելու և պատժելու կարիք չունի. Լավրով

Ռուսաստանի արտգործնախարար Սերգեյ Լավրովը МГИМО-ում իր ավանդական ելույթի ժամանակ ասել է, որ Ռուսաստանը կարիք չունի փակելու սահմանները եվրոպական երկրների քաղաքացիների համար՝ ի պատասխան ռուսների համար Շենգենյան վիզայի սահմանափակումների, գրում է Gazeta-ն։

«Մենք չենք ինքնամեկուսացվելու, ես կարծում եմ, որ ի պատասխան այս «շենգենյան պատերի», որոնք նրանք հիմա փորձում են մեզ համար կազմակերպել, մենք չպետք է փակենք, չպետք է փոխադարձաբար և հավաքականորեն պատժենք եվրոպական երկրների քաղաքացիներին»,- ասել է նա։

Ավելի վաղ Սլովենիայի ԱԳՆ ղեկավարը ռուսների համար վիզաների մասին ԵՄ որոշումը «հստակ ազդանշան» էր անվանել։

ԵՄ ԱԳ նախարարները օգոստոսի 31-ին պայմանավորվել են սառեցնել Ռուսաստանի Դաշնության հետ վիզային ռեժիմի դյուրացման համաձայնագիրը։ Ինչպես և սպասվում էր, այս որոշումը կավելացնի ռուսաստանցիների համար վիզաների ստացման ժամանակը, ինչպես նաև դրանց մշակման վճարը, և, ընդհանուր առմամբ, կբարդացնի գործընթացը։ Միաժամանակ, եվրոպացի նախարարներին չի հաջողվել համաձայնության գալ Ռուսաստանի քաղաքացիներին շենգենյան վիզաների տրամադրման ամբողջական արգելքի շուրջ։