Ալիևն Ադրբեջանի նոր դեսպանատուն է բացել Հռոմում

Հռոմում տեղի է ունեցել Իտալիայի Հանրապետությունում Ադրբեջանի Հանրապետության դեսպանության նոր շենքի բացումը։ Բացմանը մասնակցել է երկօրյա աշխատանքային այցով Հռոմ ժամանած Ադրբեջանի նախագահ Իլհամ Ալիեւը, հայտնում է АПА-ն։

Հռոմում Ադրբեջանի դեսպանատունն այսուհետ կտեղակայվի անցյալ դարի 40-ականներին դիվանագիտական ներկայացուցչությունների թաղամասում կառուցված շենքում։

Շենքի առաջին եւ երկրորդ հարկերը հատկացվել են ադրբեջանական մշակույթի կենտրոնին, իսկ 3-5-րդ հարկերը՝ դեսպանատանը։ Հատկանշական է, որ ադրբեջանական լրատվամիջոցների հաղորդագրություններում այս կենտրոնին գրեթե ավելի շատ տեղ է հատկացվում, քան բուն նախագահի այցին։ «Հռոմում ադրբեջանական մշակույթի կենտրոնի գործունեության մեկնարկը լայն հնարավորություններ կբացի Ադրբեջանի հարուստ պատմամշակութային ժառանգության հանրահռչակման համար»,- գրում են ադրբեջանական լրատվամիջոցները։

Հաշվի առնելով, որ Ադրբեջանը ձգտում է տիրանալ հարեւան ժողովուրդների եւ առաջին հերթին հայ ժողովրդի պատմամշակութային ժառանգությանը, կարելի է սպասել, որ շուտով կենտրոնը կսկսի ծառայել իր ուղղակի նպատակին՝ կփորձի ապատեղեկատվություն տարածել Եվրոպայի կենտրոնում՝ ուրիշի ժառանգությունը ներկայացնելով որպես իրենը: Նմանատիպ փորձեր արդեն եղել են։