Եվրամիության օրենսդական դաշտին մոտարկման ծրագիրը՝ Կառավարության նիստում

Հոկտեմբերի 18-ին տեղի ունեցող կառավարության նիստի ժամանակ հաստատման է ներկայացվելու Գյուղատնտեսության և ագրովերամշակման ոլորտների օրենսդրական դաշտը Եվրամիության օրենսդական դաշտին մոտարկման ծրագիրը: Նախագիծը մշակվել է ՀՀ գյուղատնտեսության նախարարության աշխատակազմի կողմից:

Սույն որոշման նախագծի ընդունումը պայմանավորված է ՀՀ կառավարության 2011 թվականի նոյեմբերի 17-ի նիստի N 45 արձանագրային որոշմամբ հավանության արժանացած ՀՀ սննդամթերքի անվտանգության համակարգի զարգացման ռազմավարության կատարումն ապահովող գործողությունների ծրագրի 1.5-րդ կետի միջոցառման իրականացման անհրաժեշտությամբ:

Ներկայումս Հայաստանի Հանրապետությունում գործող գյուղատնտեսության և ագրովերամշակման ոլորտների օրենսդրական դաշտը արդիականացման կարիք ունի` հին ստանդարտները ու պարտադիր սերտիֆիկացման պահանջները չեն համապատասխանում Առևտրի համաշխարհային կազմակերպության Առևտրի տեխնիկական խոչընդոտների (ԱՏԽ) համաձայնագրի պահանջներին: Հանրապետությունում ներդրված չէ նաև միջազգային լավագույն փորձը, և բարձր չէ սպառողների շահերի պաշտպանության մակարդակը: Բացի այդ, Եվրամիության և Հայաստանի միջև Խորը և համապարփակ ազատ առևտրի համաձայնագրի (ԽՀԱԱՀ) շուրջ բանակցությունների մեկնարկի տեսանկյունից խնդրահարույց է առևտրի տեխնիկական խոչընդոտների ոլորտը, որի բարեփոխումը ենթադրում է նաև տեխնիկական կանոնակարգերի աստիճանական ներդաշնակեցում Եվրամիության դիրեկտիվներին: Հայաստանի գյուղատնտեսության և ագրովերամշակման ոլորտների օրենսդրությունը Եվրամիության պահանջներին և օրենսդրությանը ներդաշնակեցված չլինելու հանգամանքը խոչընդոտում է Հայաստանում արտադրվող արտադրանքի արտահանմանը և չի նպաստում սպառողների ու պետության շահերի արդյունավետ պաշտպանությանը:

Գյուղատնտեսության և ագրովերամշակման ոլորտների օրենսդրական դաշտը Եվրամիության օրենսդական դաշտին մոտարկման ծրագիրը հաստատելու մասին Հայաստանի Հանրապետության կառավարության որոշման ընդունման արդյունքում նշված ոլորտներում գործող իրավական ակտերը կմոտարկվեն Եվրամիության դիրեկտիվներին, տեղական արտադրողի համար ապահովելով թողարկվող արտադրանքի մրցունակության բարձրացում և ազատ մուտք արտաքին շուկաներ, որը կնպաստի նաև Հայաստանի Հանրապետության տնտեսության զարգացմանն ու սպառողների շահերի պաշտպանության մակարդակի բարձրացմանը: