Ձեռնամուխ են լինելու սերտ համագործակցության

ՀՀ սփյուռքի նախարար Հրանուշ Հակոբյանն ընդունեց Արևմտահայոց ազգային համագումարի ոչ կառավարական միջազգային կազմակերպության նախագահ Սուրեն Սերայտարյանին, փոխնախագահներ Կարեն Միքայելյանին և Նորատ Տեր-Գրիգորյանին:

Արևմտահայոց ազգային համագումարի ոչ կառավարական միջազգային կազմակերպությունը գրանցված է Փարիզում՝ Ֆրանսիայի 1901 թվականի օրենսդրության համաձայն և անդամագրված է ՄԱԿ-ի տնտեսական և սոցիալական խորհրդի մեջ՝ իբրև միջազգային հասարակական ոչ կառավարական կազմակերպություն:

Կազմակերպության ղեկավարները նախարարին ներկայացրեցին կազմակերպության նպատակներն ու ծրագրերը: Կազմակերպությունը պետք է հանդես գա միջազգային ասպարեզում՝ իբրև արևմտահայոց՝ Օսմանյան կայսրության նախկին հայ քաղաքացիների ժառանգների լիազոր ներկայացուցչական մարմին՝ պաշտպանելու նրանց ոտնահարված շահերն ու իրավունքները: Կազմակերպությունը կատարելու է ժամանակի ընթացքում համապատասխան աշխատանք, որպեսզի հնարավոր դարձնի ներկայացնել թուրքական իշխանություններին արևմտահայ պահանջները՝ հատուցելու 1915-1923թ.թ. Հայոց Մեծ Եղեռնի հետևանքով հասցված բարոյական, նյութական և տարածքային վնասները:

ՀՀ սփյուռքի նախարարության և Արևմտահայոց ազգային համագումարի ոչ կառավարական միջազգային կազմակերպությունը ձեռնամուխ են լինելու սերտ համագործակցության: