Մերժվեց տեսա և լուսանկարահանումն արգելելու միջնորդությունը

Մեղադրյալ Գարիկ Մարգարյանի փաստաբանը ներկայացրեց միջնորդություն իր պաշտպանյալի լուսանկարումը և տեսանկարահանումն արգելելու համար՝ հղում կատարվելով մեղադրյալի անմեղության կանխավարկածին։

Մեղադրող կողմը՝ դատախազ Արթուր Դավթյանը, առարկեց միջնորդության դեմ՝ նշելով որ դատարանը չի կարող գնահատականներ տալ և խոչնդոտել լրատվամիջոցների աշխատանքին։ Նա նշեց նաև, որ դրանով կխախտվի գործի հրապարակայնության սկզբունքը։

Տուժող կողմի փաստաբաններ Վահե Գրիգորյանը և Լուսինե Հակոբյանը նշեցին, որ գոյություն ունի խոսքի ազատության իրավունք, այդ թվում՝ մամուլը ունի տեղեկատվություն տալու, իսկ հանրությունը ստանալու իրավունք, ինչը տարածվում է նաև դատական նիստերի լուսաբանման վրա, մանավանդ՝ նման հնչեղություն ստացած գործերի պարագայում։

Տուժող կողմի փատաբանները, անդրադառնալով նաև պաշտպանվող կողմի միջնորդության այն հիմնավորմանը, թե լուսանկարումն ու տեսանկարահանումը արգելելու անհրաժեշտությունը պայմանավորված է նաև լրատվամիջոցների կողմից մեղադրյալների անմեղության կանխավարկածը չպահելու և նրանց որպես հանցագործներ ներկայացնելու հետ, նշեցին, որ տվյալ պարագայում կարելի է լրատվամիջոցներին ներկայացնել զրպարտության հայց, ոչ թե արգելել նկարահանումը։

Դատավոր Դավիթ Հարությունյանը մերժեց միջնորդությունը՝ ելնելով դատաքննության հրապարակայնության սկզբունքից։