Տեղի կունենա «ArmProd EXPO 2012» միջազգային մասնագիտացված ցուցահանդեսը

Տնտեսություն 18 Հոկտեմբեր, 2012 19:57

Հայաստանի Հանրապետության գյուղատնտեսության նախարարությունը, Հայաստանի արդյունաբերողների և գործարարների (գործատուների) միությունը և LOGOS EXPO Center ցուցահանդեսային ընկերությունը հոկտեմբերի 19-21-ը կազմակերպում են «ArmProd EXPO 2012թ. միջազգային մասնագիտացված ցուցահանդես:

Մեծ հեղինակություն վայելող և ձևավորված ավանդույթներով հանրապետության խոշորագույն սննդի միջազգային «ArmProd EXPO» ցուցահանդեսը համարվում է տարվա գլխավոր իրադարձություններից մեկը, որին մասնակցում են սննդամթերքի և խմիչքների առաջատար արտադրողները, մատակարարները և դիստրիբյուտորները:

Ոլորտի առաջատար ընկերությունների հետ միասին ցուցահանդեսին մասնակցում են նաև փոքր և միջին բիզնեսի ներկայացուցիչներ, ում արտադրանքը արդեն որոշակի տեղ է գրավում երկրի ներքին շուկայում, և «ArmProdEXPO» ցուցահանդեսը բացառիկ հնարավորություն է ընձեռում հանգամանորեն ցուցադրել սննդամթերքի ողջ տեսականին, առավել լիարժեք ուսումնասիրել և ստանալ անհրաժեշտ տեղեկատվություն Հայաստանում և ողջ տարածաշրջանում գործող ֆիրմաների, կազմակերպությունների և ապրանքանիշերի մասին և ստանալ գործնական տեղեկատվություններ ու կանխատեսումներ շուկայի զարգացման մասին, գտնել շահավետ գործընկերներ կամ օտարերկրյա ներդրողներ:

Ցուցահանդեսը նպաստում է նաև արտադրողների, դիստրիբյուտորների, բիզնես-խորհրդատուների, սպառողական շուկայի հետազոտողների անմիջական բանակցություններին սննդի ցանցերի մատակարարների հետ:

Ցուցահանդեսն ամբողջությամբ ընդգրկում է Հայաստանի սննդի շուկան և հատվածավորվում է թեմատիկ բաժինների՝ համախմբելով սննդամթերքի արտադրության և վերամշակման գրեթե բոլոր ոլորտները խոշորագույն սննդի ցուցահանդեսում, և արտացոլում ներքին և արտաքին ագրոբիզնեսի զարգացման հիմնական միտումները:

Հոկտեմբերի 20 - ին «ArmProd EXPO 2012» ցուցահանդեսի շրջանակում տեղի կունենա Հայաստանի խոշորագույն «Ագրոֆորումը»՝ նվիրված գյուղատնտեսության զարգացման և գյուղատնտեսական արտադրանքի արդյունաբերական վերամշակման հարցերին: