Ինքնաթիռն արտակարգ վայրէջք է կատարել թռիչքի ժամանակ աջ թևի վրա բռնկված հրդեհի պատճառով (տեսանյութ)

Delta Airlines ավիաընկերության ինքնաթիռն արտակարգ վայրէջք է կատարել թռիչքի ժամանակ աջ թևի վրա բռնկված հրդեհի պատճառով։ Միջադեպը ֆիքսվել է տեսանյութով, որը հրապարակել է Lad Bible-ը։

Ուրբաթ օրը՝ փետրվարի 10-ին, ամերիկյան Delta Airlines ավիաընկերության ինքնաթիռը Շոտլանդիայի Էդինբուրգ քաղաքից Նյու Յորք էր թռչում։ Թռիչքից մի քանի րոպե անց ուղևորները լսել են ուժեղ ձայն և տեսել, որ օդանավի աջ թեւը այրվում է։ 

«Չնայած ականջակալներին և երաժշտությանը, աղմուկը անտանելի էր: Հետո բոլոր հեռուստացույցներն անջատվեցին։ Հետո տեսանք, թե ինչպես է կապիտանը միջանցքով գնում-գալիս, և մտածեցինք, որ դա լուրջ խնդիր է։ Հայտարարվեց, որ ինքնաթիռը շարժվում է դեպի Պրեստվիկ (Գլազգոյի Պրեստվիկ օդանավակայան)։ Երբ մենք սկսեցինք իջնել, ահավոր լռություն տիրեց՝ հառաչանքներով։ Մարդիկ սկսեցին լաց լինել։ Ես բռնեցի ընկերոջս ձեռքը, քանի որ անկեղծորեն մտածում էի, որ մենք վայրէջք չենք կատարի»,- պատմել է ուղևորներից մեկը ինքնաթիռում տեղի ունեցած խուճապի մասին։

Ինքնաթիռը բարեհաջող վայրէջք է կատարել Շոտլանդիայի արևմուտքում գտնվող օդանավակայանում, օդանավին դիմավորել են օդանավակայանի հրշեջ բրիգադը և հրշեջ-փրկարարական ծառայությունը։ Բոլոր ուղևորներն ու անձնակազմի անդամները տարհանվել են, ոչ ոք չի տուժել։