Ինչո՞ւ է ՊԵԿ-ը խտրական քաղաքականություն իրականացնում

Անհասկանալի է մնում, ինչո՞ւ «Երեւան Սիթի»-ի դեպքում ոչ ոք չձերբակալվեց, իսկ «Զովք»-ի դեպքում ՊԵԿ-ը կիրառեց ծայրահեղ կոշտ միջոցներ, միթե՞ սա հովանավորչություն չէ։ Այս մասին ֆեյսբուքյան իր էջում գրել է տնտեսագետ Սուրեն Պարսյանը։

Նա, մասնավորապես գրել է.

««Զովք» սուպերմարկետի շուրջ վերջին օրերի աղմուկը հիշեցրեց 2018 թվականի իրադարձությունները, երբ 2018 թվականի մայիս-հունիս ամիսներին ՀՀ պետական եկամուտների կոմիտեն բացահայտեց, որ դեռեւս 2016 թվականի վերջին, տեղական գյուղմթերքի գնաճ չառաջացնելու պատրվակով, համաձայնություն է ձեռք բերվել ՀՀ ՊԵԿ նախկին ղեկավարության հետ` գյուղացիներից գնված գյուղմթերքի վաճառքը «Երեւան Սիթի» սուպերմարկետների ցանցից իրականացնել տարբեր անձանց անվամբ հիմնադրված 461 ԱՁ-ներով, որոնց իրացման շրջանառության սահմանաչափը 115 մլն ՀՀ դրամ է, ինչը հնարավորություն է ընձեռել 20 տոկոս ԱԱՀ-ի եւ շահութահարկի փոխարեն վճարել ընդամենը 2 տոկոսի չափով շրջանառության հարկ: ԱԺ նախկին պատգմավոր Սամվել Ալեքսանյանի ընտանիքի հետ կապ ունեցող «Երեւան Սիթի»-ի ստվերային շրջանառությունը գնահատվում էր 40 մլրդ դրամ։ Տարբեր գնահատականներով թաքցված հարկի չափը կազմում էր 6-7 մլրդ դրամ։ 2023 թվականին «Զովք» սուպերմարկետի հնարավոր չարաշահումների պարագայում պակաս վճարված հարկի գումարը գնահատվում է 4,1 մլրդ դրամ, սակայն ձերբակալվել են սեփականատերը, տնօրենը, գլխավոր հաշվապահն ու եւս մեկ փոխկապակցված անձ:

Այո, թաքցված հարկերը բոլորը պետք է վճարեն, միաժամանակ պետք է կարգավորվի սուպերմարկետների գործունեությունը՝ սահմանափակելով նրանց ազդեցությունը մանրածախ առեւտրի վրա։ Սակայն անհասկանալի է մնում, ինչու՞ «Երեւան Սիթի»-ի դեպքում ոչ ոք չձերբակալվեց, իսկ «Զովք»-ի դեպքում ՊԵԿ-ը կիրառեց ծայրահեղ կոշտ միջոցներ։ Միթե՞ սա հովանավորչություն չէ։

Հայաստանում օլիգարխայի սերտաճում իշխանությունների հետ շարունակվում է, որն էլ ավելի է թուլացնում մեր երկրի անվտանգությունը»։

Հիշեցնենք, որ «Նոր Զովք» ՍՊ ընկերությունում առերեւույթ հարկային չարաշահումներ կատարելու, տեղեկատվական տեխնոլոգիաների կիրառմամբ իրացման շրջանառությունն առանձնապես խոշոր չափերով նվազ ցույց տալու միջոցով հարկային պարտավորությունները չկատարելու դեպքի առթիվ ՀՀ քննչական կոմիտեի տնտեսական հանցագործությունների եւ մաքսանենգությունների քննության գլխավոր վարչությունում նախաձեռնված քրեական վարույթի ծավալուն նախաքննության ընթացքում ձեռք բերված փաստական տվյալների հիման վրա «Նոր Զովք» ՍՊԸ սեփականատիրոջը եւ երկու աշխատակիցներին մեղադրանք է ներկայացվել ՀՀ քրեական օրենսգրքի 290-րդ հոդվածի 3-րդ մասի 1-ին եւ 2-րդ կետերով նախատեսված հանցավոր արարքներ կատարելու, իսկ ծրագրային աջակցություն ցոցւաբերած ՍՊԸ սեփականատիրոջը՝ նշված հանցավոր արարքների կատարմանն օժանդակելու համար։

Երեւան քաղաքի ընդհանուր իրավասության առաջին ատյանի դատարանի որոշմամբ՝ «Նոր Զովք» ՍՊԸ սեփականատեր Ա․Ա․-ն, ընկերության տնօրեն Ռ․Ա․-ն, գլխավոր հաշվապահ Ս․Ս․-ն, ինչպես նաեւ առերեւույթ հանցավոր մեխանիզմի կիրառմանը տեխնոլոգիական-ծրագրային աջակցություն ցուցաբերած մեկ այլ ՍՊԸ-ի սեփականատեր Վ․Ս․-ն կալանավորվել են։