ԼՈՒՐԵՐ․com-ը հերքում է

ԼՈՒՐԵՐ․com լրատվական կայքը հերքում է իր ինտերնետային կայքում և ֆեյսբուքյան էջում 2023 թ․ փետրվարի 27-ին ««Նաիրի Ինշուրանս» ապահովագրական ընկերությունը անբարեխիղճ վերաբերմունք Է դրսևորել հաճախորդի հանդեպ» վերտառությամբ հրապարակումը։ Ստորև ներկայացնում ենք հերքումը ամբողջությամբ։

«Ի պատասխան Lurer.com լրատվական կայքում 27.02.2023 թվականին հրապարակված «Նաիրի Ինշուրանս» ապահովագրական ընկերությունը անբարեխիղճ վերաբերմունք է դրսևորել հաճախորդի հանդեպ» վերնագրով հոդվածին` հայտնում ենք, որ ավտոմեքենան «Նաիրի Ինշուրանս» ընկերությունում ապահովագրված է եղել ոչ լրիվ արժեքով, այսինքն` ապահովագրական ծածկույթը ցածր է եղել մեքենայի իրական արժեքից, բացի այդ, ապահովագրության պայմանագրով առկա է նաև չհատուցվող գումար (ֆրանշիզա), որի չափով նվազեցում է կատարվում նախքան հատուցման վճարումը։ Ապահովագրության վերոնշյալ պայմանները սահմանված են կնքված ապահովագրության պայմանագրում և «Նաիրի Ինշուրանս»-ն ապահովագրական հատուցում տրամադրելիս առաջնորդվել է բացառապես ապահովագրության պայմանագրով։
Այսինքն` ստացված 13.404 ՀՀ դրամը ոչ թե վնաս գնահատող փորձագետի կողմից գնահատված վնասի չափն է, այլ տվյալ ապահովագրության պայմանագրի շրջանակներում ապահովադրին հատուցման ենթակա գումարը՝ հաշվի առնելով ապահովագրության համամասնությունը և նվազեցնելով չհատուցվող գումարը։
Պայմանագրի մանրամասները, մասնավորապես՝ չհատուցվող գումարի, ապահովագրության համամասնության չափերը չենք կարող հանրայնացնել, քանի որ դրանք հանդիսանում են հաճախորդի ապահովագրական գաղտնիք պարունակող տեղեկություններ։ Տեղեկացնենք, որ հաճախորդին ևս տրվել է պատշաճ  մեկնաբանություն իր ավտոմեքենայի հատուցման գումարի չափի վերաբերյալ։
Միաժամանակ նշենք, որ յուրաքանչյուր հաճախորդ կարող է ավտոմեքենայի (կասկո) ապահովագրություն իրականացնել լրիվ արժեքով և/կամ չհատուցվող գումարի բացակայությամբ, որի դեպքում ապահովագրավճարի չափը կլինի ավելի բարձր։
Նաիրի Ինշուրանս ապահովագրական ընկերությունը միշտ բաց է հաճախորդների հետ շփման, նրանց հուզող խնդիրները լսելու և հնարավորության, օրենքի ու առկա կարգավորումների շրջանակում դրանց լուծում տալու համար»։