«Freedom House»-ն արձանագրել է Ադրբեջանի կողմից իրականացված մի շարք հանցագործություններ ՀՀ նկատմամբ
Բլոգոսֆերա
«Freedom House» միջազգային հեղինակավոր իրավապաշտպան կազմակերպությունն արձանագրել է Ադրբեջանի կողմից իրականացված մի շարք հանցագործություններ Հայաստանի նկատմամբ։
ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը ներկայացրել է զեկույցից հատվածներ:
Սեպտեմբերին ադրբեջանական զինված ուժերը ներխուժել են Հայաստանի տարածք։ Շարունակվող ռազմական հակամարտության սրման հետևանքով զոհվել է մոտ 200 և վիրավորվել ավելի քան 293 հայ զինծառայող, երեք քաղաքացիական անձ սպանվել է, 20 զինվոր գերեվարվել է։
Պաշտոնական զեկույցները պարունակել էին հավաստի ապացույցներ այն մասին, որ ադրբեջանական զորքերը կատարել են ռազմական հանցագործություններ։ Չնայած ակտիվ մարտական գործողությունները շարունակվել են երկու օր՝ դրան հաջորդած հրադադարը պարբերաբար խախտվել է։
Ադրբեջանական ուժերը շարունակաբար հարձակվել են ողջ սահմանի երկայնքով, օկուպացրել հայկական տարածքներ՝ մեծացնելով լայնամասշտաբ պատերազմի վտանգը։
2020 թվականի նոյեմբերին հրադադարից հետո ադրբեջանական ուժերը վերահսկողության տակ են վերցրել Սյունիքի մարզը Հայաստանի մյուս հատվածների հետ կապող միակ խոշոր ճանապարհի` Գորիս-Կապան մայրուղու 21 կմ տարածքը՝ բաժանելով գյուղերը և զրկելով բնակիչներին ազատ տեղաշարժվելու հնարավորությունից։ 2021 թվականի նոյեմբերին ադրբեջանական ուժերը ճանապարհի երկայնքով նոր անցակետեր են կառուցել։
2022 թվականին տասնյակ հայ ռազմագերիներ կալանքի տակ են մնացել Ադրբեջանում։ Նրանցից ոմանք խոշտանգումների են ենթարկվել կալանքում գտնվելու ժամանակ։
«Կարևոր եմ համարում նման զեկույցներն իրավապաշտպան կազմակերպության կողմից, հորդորում մյուսներին լինել անկաշկանդ՝ Ադրբեջանի կողմից ոչ միայն Հայաստանի, այլև արդեն 3 ամիս շրջափակված Արցախի դեմ ցանկացած խախտման, միջազգային իրավունքի կոպտագույն ոտնահարման մասին բարձրաձայնելու տեսանկյունից», - նշել է Թովմասյանը:
ՈՒՂԻՂ ԵԹԵՐ
Ամենադիտված 
Ցմահ դատապարտյալ Արթուր Քոչարյանն ազատ է արձակվել
